Albulena Haxhiu nga Lëvizja Vetëvendosje ka reaguar pas deklaratave të Partisë Demokratike të Kosovës, e cila gjatë ditës së sotme është shprehur se Kryeparlamentari Konjufca duhet t’i tregojë lidhjet familjare me të dënuarin Sadri Ramabaja.
Përpos kësaj, nga PDK-ja u tha se Kuvendi i Kosovës ka marrë një karakter parapolitik me ardhjen e Glauk Konjufcës në krye të tij.
PDK-ja në këtë reagim të tyre e quajti Glauk Konjufcën edhe si ideolog i organizatës terroriste “Syri i Popullit”, ndërsa në anën tjetër, Albulena Haxhiu nga LVV-ja, këto komente të PDK-së i quajti si përpjekje të dështuara me qëllimin e vetëm njollosjen e figurës së Glauk Konjufcës.
Ajo tutje ka rikujtuar edhe akuzat e nmëhershme të PDK-së për Konjufcën, duke thënë se “Dikur shpifnin se ka qenë në “SHIK” e tash shpifin se ka lidhje me organizatën “Syri i Popullit”.
Haxhiu përmes këtij statusi në rrjetin e saj social Facebook, ka shkruar gjithashtu se për ta ndalur këtë abuzim, Gjykata duhet ta trajtojë sa më shpejt padinë për shpifje për rastin e parë, si dhe ka kërkuar nga Prokuroria që ta trajtojë sa më parë kallëzimin penal kundrejt Thaçit dhe Veselit për deklaratat e rreme nën betim të penalizuar në Kodin Penal.
Në fund ajo tha se zgjedhja e Glaukut në pozitën e Kryetarit të Kuvendit, ia ka kthyer dinjitetin Kuvendit, dhe se PDK-ja duhet të mësohet me këtë ndryshim pozitiv.
Më poshtë edhe statusi i plotë i Albulena Haxhiut:
“Sa përpjekjet e dështuara me qëllim të njollosjes së figurës së Glauk Konjufcës!
Dikur shpifnin se ka qenë në “SHIK” e tash shpifin se ka lidhje me organizatën “Syri i Popullit”.
Për ta ndalur këtë abuzim, Gjykata duhet sa më parë të trajtoj padinë për shpifje për rastin e parë ndërsa prokuroria sa më parë të trajtoj kallëzimin penal kundrejt Thaçit e Veselit për deklaratat e rreme nën betim të penalizuar në Kodin Penal.
Zgjedhja e Glaukut në pozitën e Kryetarit të Kuvendit, ia ka kthyer dinjitetin Kuvendit.
PDK duhet të mësohet me këtë ndryshim pozitiv.” /Buletini Ekonomik/