Kryetari i Shoqatës së Eksportuesve të Kosovës, Nexhat Hasani, ka bërë me dije se gjendja e eksportuesve të Kosovës është vështirësuar për shkak të pandemisë, por edhe të mosndihmës së veçantë në kuadër të rimëkëmbjes ekonomike për eksportuesit e vendit.
Hasni në një bisedë për gazetën “Epoka e re”, ka thënë se qeveria nuk ka ndarë asnjë fond të veçantë për eksporte, gjë që sipas tij kjo e ka vështirësuar gjendjen e këtij sektori.
“Gjendja e eksportuesve të Kosovës është e rëndë dhe kemi përkeqësim të gjendjes. Kemi shumë kompani të cilat i kanë humbur tregjet. Është fatkeqësi edhe më e madhe që qeveria nuk ka ndarë asnjë fonde për eksporte. Çfarë ata kanë ndarë janë ndihmat për sektorin e gastronomisë dhe për eksport, kurse për eksportuesit nuk është ndarë dhe nuk është parapa asnjë fond. Ka kompani të cilat i kanë humbur tregjet dhe që të rikthehen është shumë vështirë, pasi prodhuesit edhe nuk kanë mundur të prodhojnë çfarë është kërkuar, gjë që është problem në vete”, ka thënë Hasani.
Më tutje, Hasani ka deklaruar se përkundër që kanë bërë kërkesë që në kuadër të pakos për rimëkëmbje ekonomike që të dedikohet një fond i veçantë për ta, sipas tij kjo kërkesë s’është përfillur.
“Shoqata jonë i ka rreth 100 anëtarë, të gjitha nga kompanitë prodhuese. Kemi kërkuar dhe kemi dërguar shkresa gjatë programit të rimëkëmbjes dhe nuk isha i ftuar në asnjë debat për dallim nga pakot fiskale më parë, por për pakon e rimëkëmbjes kemi pas asnjë ftesë”, ka thënë Hasani.
