Gjermania: Krijimi i qeverisë në Kosovë, nevojë urgjente

Berlini është i interesuar për krijimin sa më të shpejtë të qeverisë së re në Kosovë.

Është bërë e ditur se drejtoresha e Ministrisë së Jashtme gjermane për Evropën Juglindore, Sabinne Schütz, në një intervistë për mediat kosovare ka thënë se Gjermania është e interesuar për krijimin e shpejtë të qeverisë së re në Kosovë, përcjell albinfo.ch.

“Ajo që duket e rëndësishme, është të vazhdohet me respektimin e vullnetit të votuesve dhe substanca të vendoset përpara – në të mirë të vendit dhe popullit të tij. Ka aq shumë gjëra për t’u bërë, edhe në Kosovë, sikur edhe në kontekstin rajonal dhe ndërkombëtar. Kjo është pikërisht arsyeja pse ne jemi të interesuar për një krijim të shpejtë të qeverisë së re”, ka thënë Schütz për koha.net.

Reklama e sponzorizuar

Po ashtu, Schütz, e cila para se ta marrë detyrën e re në muajin gusht, ka shërbyer si ambasadore e Gjermanisë në Tiranë, ka folur edhe për nevojën që të rinisë dialogu Kosovë-Serbi, si dhe parakushtet që duhen plotësuar të dy palët që ky dialog të kthehet në binarë në një atmosferë të përgjithshme të përmirësuar.

Nga ana tjetër, ajo ka folur edhe për mundësitë që Kosova të marrë liberalizimin e premtuar të vizave, por edhe nevojën që qeveria e re të jetë funksionale dhe të vazhdojë me reformat, posaçërisht ato në fushën e sundimit të ligjit, luftimit të korrupsionit dhe krimit të organizuar.