MPB-ja nis hartimin për Projektligjin e sigurisë kibernetike

0
2

Ministria e Punëve të Brendshme të Kosovës përmes një komunikate për media bën të ditur se është duke e hartuar Projektligjin për siguri kibernetike.

Bëhet e ditur se sot në Ministrinë e Punëve të Brendshme u mbajt takimi i grupit punues për Strategjinë Shtetërorë të Sigurisë Kibernetike dhe Planin e Veprimit 2020-2025.

Takimin e hapi Koordinatori i Strategjisë, njëherazi zëvendësministri i Punëve të Brendshme, Zafir Berisha, i cili theksoi se prioritet i MPB-së është zbatimi me sukses i Strategjisë Shtetërore të Sigurisë Kibernetike.

Berisha tha se ngritja e sigurisë është e domosdoshme në të gjitha institucionet publike dhe se tashmë janë bërë plane konkrete të ngritjes së kapaciteteve profesionale dhe teknologjike.

“Me këtë rast, nga grupi punues fillimi i muajit nëntor u përcaktua si objektiv i realizimit të draftit fillestar me qëllimin që t’i hapë rrugë kompletimit të Strategjisë së re. Ministria e Punëve të Brendshme është duke hartuar projektligjin për siguri kibernetike, ku qëllimi i këtij Ligji do të jetë që të përcaktojë parimet e sigurisë kibernetike, parandalimin dhe luftimin e krimit kibernetik në Republikën e Kosovës”, thuhet në komunikatë.