Kontrata e shumëpërfolur mes Telekomit të Kosovës dhe Z-Mobile mund të shkëputet krejtësisht nga aksionari, në këtë rast Qeveria e Kosovës. Kjo e fundit ka propozuar themelimin e një komisioni me ekspertë të fushës, i cili do ta bëjë vlerësimin e “të gjitha marrëveshjeve komerciale mes Telekomit dhe Z-Mobile”.
Kërkesa për ta ‘hetuar’ këtë kontratë, e cila rrezikon t’ia ‘gëlltisë’’ Telekomit edhe 30 milionë euro, ka ardhë nga Komisioni Ndërministror për Ndërmarrjet Publike, i cili funksionon në kuadër të Minstrisë së Zhvillimit Ekonomik, shkruan Buletini Ekonomik.
“Shqyrtimi i Rekomandimit të Komisinit Ndërministror për Ndërmarrjet Publike për Themelimin e Gupit Punues të Ekspertëve për analizimin e marrëveshjeve komerciale në mes të “Telekomit të Kosovës” dhe “Dardafon.net”, thuhet në dokumentin e përgatitur nga Qeveria me pikat që do të diskutohen në mbledhjen e radhës të Qeverisë, e cila pritet të mbahet sot.
Buletini Ekonomik merr vesh përmes burimeve të sigurta se kjo kontratë ka qenë njëra nga arsyet e dorëheqjes së befasishme të Gent Begollit nga pozita e kryeshefit. Sipas këtyre burimeve, kryeministri Haradinaj ka kërkuar në vazhdimësi nga kryeshefi i dorëhequr që ta shkëpus krejtësisht kontratën mes Telekomit dhe Z-Mobile.
Tashme në këtë drejtim janë ndërmarrë edhe veprime konkrete. Themelimi i këtij komisioni për t’i vlerësuar të gjitha marrëveshjet mes Telekomit dhe Z-Mobile, pritet t’i hap rrugë Bordit të ndërmarrjes, që varësisht prej rezultateve, të vijë me një vendim.
Ndryshe në fund të vitit 2016 Telekomi i Kosovës e humbi rastin me Z-Mobile në Tribunalin Ndërkombëtarë të Arbitrazhit. Sipas këtij vendimi,Telekomi i Kosovës-Vala, duhet t’i paguajë rreth 30 milionë euro tek Devolli Group apo Z-Mobile. Ky vendim pritet ta falimentojë ndërmarrjen, dikur më pofitabilja në vend. /Buletini Ekonomik/
