Kreu i Lëvizjes Vetëvendosje, Albin Kurti, tha se sot kemi nevojë për ndarjen e qeverisjes publike nga tajkunët privatë pasi sipas tij tashmë nuk kemi vetëm korrupsion në institucione, por edhe institucione në korrupsion.
Pak para seancës së jashtëzakonshme të Kuvendit të Kosovës, të thirrur nga partia e Kurtit për heqjen e monopolit të homologimit të veturave, ai tha se edhe homologuesit duhet t’i homologojë shteti.
“Homologuesit duhet t’i homologojë shteti i së drejtës, kundër monopoleve në ekonomi, kundër korrupsionit në institucione, kundër dorëzimit të shtetit te privatët”, shkroi Kurti.
Shkrimi i plotë i Albin Kurtit:
Kush do t’i homologojë homologuesit?
Ashtu sikurse që Glass Steagall Act nga viti 1933 në ShBA i ndante investimet nga bankat komerciale, në Kosovë sot kemi nevojë për ndarjen e qeverisjes publike nga tajkunët privatë. Sepse tashmë nuk kemi vetëm korrupsion në institucione, por edhe institucione në korrupsion.
Shteti i korporatës shpie në fashizëm. Këtë e kemi parë në Gjermani e Itali midis dy luftërave botërore. Ish Presidenti i ShBA-ve, Franklin Delano Roosevelt, në porosinë që ia dërgon Kongresit të ShBA-ve më 29 prill 1938 thotë: “Liria e demokracisë nuk është e sigurt nëse njerëzit e tolerojnë rritjen e pushtetit deri në pikën ku ai bëhet më i fortë sesa vetë shteti demokratik. Kjo, në esencë, është fashizëm – pronësi e qeverisë nga një individ, nga një grup apo nga cilado fuqi private kontrolluese”.
John Ralston Saul thekson tri qëllime të lëvizjes korporatiste në vitet e ’20-ta të shekullit të kaluar në tri shtete (Gjermani, Itali dhe Francë) të cilat kaluan nëpër fashizëm: 1) të zhvendoset pushteti direkt te grupet ekonomike ose shoqërore të interesit; 2) të shtyhet iniciativa biznesore në fushat që normalisht janë të rezervuara për organet publike; 3) të shlyhen kufijtë ndërmjet interesit publik dhe privat, pra, të sfidohet ideja e interesit publik.
Homologuesit duhet t’i homologojë shteti i së drejtës, kundër monopoleve në ekonomi, kundër korrupsionit në institucione, kundër dorëzimit të shtetit te privatët.
