Të anashkaluar dhe pa asnjë adresë të saktë ankimi për të drejtat e tyre po ndihen ish-punëtorët e ndërmarrjes “Ramiz Sadiku”, tashmë e privatizuar.
Idriz Zhinipotoku deklaron se pas privatizimit të kësaj ndërmarrjeje atyre nuk iu është dhënë 20 përqindëshi i parave nga shitja.
Ankesat e tyre tregojnë se i kanë adresuar në Agjencinë Kosovare të Privatizimit dhe në Dhomën e Posaçme të Gjykatës Supreme të Kosovës, porse atyre vetëm iu ishte kumtuar se afati ligjor për aplikim kishte kaluar, raporton KTV.
Sipas Zhinipotokut, 20 përqindëshi iu është dhënë punëtorëve që kanë punuar pas luftës, duke anashkaluar ata që kanë dhënë kontribut të madh aty.
Ai shton se largimi i tyre prej listave të punëtorëve dhe dhënia e 20 përqindëshit për persona që nuk kanë kontribuar, është bërë prej sindikatës së vetëquajtur të “Ramiz Sadikut” dhe një grupi të vogël personash.
Përfaqësuesi i këtij grupi punëtorësh, thotë se institucionet po e bartin përgjegjësinë te njëra-tjetra duke mos u dhënë atyre asnjë përgjigje.
Një tjetër ish-punëtor i kësaj ndërmarrjeje, Maliq Demiri, tregon se kishte punuar aty për 18 vjet duke shtuar se për privatizim nuk u njoftua asnjëherë.
Por, Agjencia Kosovare e Privatizimit, e konsideron këtë proces të mbyllur.
Përmes një përgjigje, zyrtarë për media i kanë thënë KTV-së e se dokumentacioni për shpërndarjen përfundimtare për punëtorët e kualifikueshëm të kësaj ndërmarrjeje është kompletuar përfundimisht në maj të 2014-s kur edhe ka përfunduar.
Aty shtohet se në Dhomën e Posaçme të Gjykatës Supreme të Kosovës brenda afatit ligjor janë parashtruar 1235 ankesa, nga të cilat kjo Dhomë aprovoi 748 ankesa të punëtorëve dhe refuzoi 590, derisa pjesa e përfituesve të 20 % u rrit nga 536 në 1284.
Punëtorët e kësaj ndërmarrjeje paralajmërojnë se nuk do të ndalen së kërkuari të drejtat e tyre, që thonë se u takojnë për kontributin e dhënë në këtë ndërmarrje.