Vullnet për arritjen e marrëveshjes së koalicionit, por me qëndrime të betonuara rreth postit të presidentit kanë proklamuar Lëvizja Vetëvendosje dhe Lidhja Demokratike.
Përveç akuzave në distancë, as të mërkurën nuk ka pasur takim mes pretendentit për kryeministër, Albin Kurti dhe kryetarit të LDK-së, Isa Mustafa, për të tentuar tejkalimin e mospajtimeve për ndarjen e pushtetit, shkruan sot “Koha Ditore”.
Vetëvendosje vazhdon të insistojë që posti i shefit të shtetit të mos përfshihet në ndarjen e pushtetit- kushti ky kryesor i LDK-së për arritjen e marrëveshjes. Veç presidentit, LDK-ja kërkon edhe postin e kryetarit të Kuvendit, zëvendëskryeministrin e parë dhe ndarjen e barabartë të ministrive.
Nënkryetarja e LDK-së, Vjosa Osmani, ka shprehur besimin për arritjen e marrëveshjes, megjithëse ka refuzuar të komentojë rreth pengesave. E ka bërë këtë pas takimit që kanë pasur me kryetarin e Grupit të Partive Popullore në Parlamentin Evropian, Manfred Weber dhe përfaqësuesen e posaçme të BE-së në Kosovë, Nataliya Apostolova.
