Sot pritet të dalë në Kuvendin e Kosovës për votim Qeveria Kurti pas arritjes së marrëveshjes për bashkëqeverisje ndërmjet Lëvizjes Vetëvendosje dhe Lidhjes Demokratike të Kosovës.
Kuvendi i Kosovës sot në ora 11:00 mban seancë plenare, me rend dite zgjedhjen e Qeverisë së Republikës së Kosovës.
Dy krerët e partive, i LVV-së, Albin Kurti dhe ai i LDK-së, Isa Mustafa të dielën konfirmuan arritjen e marrëveshjes për koalicion, pas më shumë se dy muajsh negociatash.
Lideri i LVV në konferencën për media pas nënshkrimit të marrëveshjes për bashkëqeverisje me liderin e Lidhjes Demokratike të Kosovës, Isa Mustafa tha se janë dakorduar që qeveria e ardhshme t’i ketë 15 ministri, dy zëvendëskryeministra dhe 33 zëvendësministra.
Kurti tha se janë marrë vesh për të gjitha çështjet.
“Kemi nënshkruar marrëveshjen, jemi marrë vesh për të gjitha, edhe për ndarjen e përgjegjësive në qeverinë e re ku do të bashkëqeverisim. Jemi dakorduar që t’i kemi 15 ministri dhe 33 zëvendësministra kjo tregon se qeveria jonë ende pa ia nisur punës ka bërë një ndryshim të madh pasi është qeveria më e vogël. Ne kemi vlerësuar që synimi ynë që t’i kemi 12 ministri ka qenë i drejt, por kemi thënë se është një tendencë për të kursyer sa më shumë, por në anën tjetër është dëshmuar se krijimi i disa superministrive është kosto më e madhe se sa t’i kemi 12 ministri. Më mirë të bëjmë reduktimin më të shpejtë në 15 ministri se sa të presim më gjatë për 12 ministri”, tha Kurti, raporton Telegrafi.
“Procesi nuk ka qenë i lehtë, por shumë më i sigurt sesa që është menduar ose transmetuar”, tha Kurti.
Ndërkaq, kryetari i LDK-së, Isa Mustafa pas nënshkrimit të marrëveshjes në konferencën për media u shpreh se kanë arritur marrëveshje që është në dobi të Kosovës dhe është në interes të ndryshimeve që duhet të ndodhin në vend.
