Presidenti i Kosovës, Hashim Thaçi pas rrëzimit të Qeverisë së Kosovës ka deklaruar se pa humbur kohë do t’i ftojë për konsultime liderët e të gjitha partive politike për të shikuar mundësinë e krijimit të qeverisë së re të vendit.
E për këtë gjë, ai tha se këtë do ta bëjë të hënën, duke shtuar do ta respektojë Kushtetutën dhe ligjet e Kosovës.
“Nga e hëna duke e respektuar ligjet dhe Kushtetutën, do të fillojë me konsultimet me partitë politike për mundësinë e formimit të Qeverisë së re. Fokusi do të jetë në çdo rrethanë që mos ta lejojë që vendi të shkojë në zgjedhje dhe shpërbëhet Kuvendi”, ka thënë ai. “Pra nga e hëna në mëngjes do ti ftoj liderët e partive për të themeluar institucionet dhe mos të ketë vakum institucional. Natyrisht fokusi im është të shkojmë drejtë një qeverie të unitetit dhe drejtë”, ka thënë ai.
Këto komente ai i bëri pas vizitës që ka zhvilluar sot në Qendrën e Studentëve të shndërruar në Karantinë, ku priten të vijnë 55 qytetarë të Kosovës nga Zvicra.
Anëtari i Kryesisë së Lëvizjes Vetëvendosje, Glauk Konjufca, mbrëmë në emisionin Desku të KTV-së ka thënë se thirrja e partive nga presidentit Hashim Thaçi për formimin e Qeverisë së re, është antikushtetuese.
Ai ka thënë se Lëvizjes Vetëvendosje me kushtetutë i takon të propozojë e para madatarin për Qeveri, pastaj nëse ajo nuk mund ta bëjë, partitë tjera mund ta propozojnë.
