Kryetari i LDK-së, Isa Mustafa, ka përkujtuar masakrën e Mejes në Ditën Ndërkombëtare të të Zhdukurve.
Ai përmes një komunikate për media ka njoftuar se kjo ditë është ende plagë e rëndë tash e mbi dy dekada.
“Sot, është Dita Ndërkombëtare e të Zhdukurve dhe për Kosovën ende është plagë e rëndë tash e mbi dy dekada. Aktualisht janë 1641 persona të zhdukur në gjithë vendin, familjarët e të cilëve presin me ankth për fatin e tyre.
Ai thotë se pranvera e vitit 1999 ka qenë më e rënda në historinë e Kosovës.
“Në këtë stinë Serbia filloi përpjekjet e fundit për të zhbërë popullin e Kosovës duke ekzekutuar me mijëra fëmijë, gra dhe burra. Kreu krime të tmerrshme kundër njerëzimit, shkatërroi, dogji dhe dëboi një popull nga shtëpitë e tyre. Është e rëndë për shumë familje që 21 vite pas luftës në Kosovë, për fat të keq varret dhe eshtrat e më të dashurve të tyre nuk i dinë ende”, ka thënë ai.
Ai thotë se Masakra e Mejes është një nga krimet më monstruize të forcave serbe.
“Kjo ditë koincidon edhe me Masakrën e Mejës, e cila është një nga krimet më monstuoze të forcave serbe mbi popullatën civile shqiptare. Në këtë masakër janë vrarë mbi 376 burra të kësaj ane. “Lëndina e Pikëllimit” është e mbushur me varre të grave, burrave, fëmijëve dhe të moshuarve të cilët nuk u kursyen. Masakra e Mejës dhe shumë masakra tjera në Kosovë janë dëshmi e krimeve të Serbisë që janë kryer në vendin tonë”, ka shkruar ai.
Sipas Mustafës, të gjitha këto ngjarje tronditën ndërgjegjen njerëzore të botës së civilizuar dhe kapërcyen çdo kufi.
Ai thotë se Serbia duhet sa më parë të kthej eshtrat e të zhdukurve dhe kryesit e krimit të përgjigjen para drejtësisë.
“Sot, është një ditë më shumë që frymëzohemi për të punuar dhe dashur më shumë shtetin tonë”, ka thënë tutje ai.
