Radhë kilometrike me kamionë të transportit të mallrave në pikën kufitare të Morinës. Bëhet fjalë për kamionët e nisur nga Shqipëria drejt Kosovës që për shkak të fluksit të lartë kanë mbetur me orë të tëra në kufi.
Drejtori i Kufirit u shpreh për News24 se ka fluks të shtuar të kamionëve ditën e sotme dhe ndaj është krijuar trafik. Drejtuesit e kamionëve shprehen se po presin prej orësh dhe kjo situatë e njëjtë është që nga koha e fillimit të pandemisë. Ata shprehen se radhët dhe pritjet janë të përditshme për shkak të procedurave doganore.
Kalimi i kamionëve të transportit të mallrave bëhet nën masa të rrepta edhe të kontrollit shëndetësor për shkak të Covid-19.
Ditë më parë mes Shqipërisë dhe Kosovës u arrit një marrëveshje për vazhdimin e bashkëpunimit për lehtësira në shkëmbimin tregtar mes dy vendeve duke marrë parasysh problemet me të cilat po përballet tregu global në kohën e pandemisë së koronavirusit.
