Ministria e Shëndetësisë ka publikuar orarin e qarkullimit të qytetarëve nga sot e deri më 18 maj, sipas shifrës së parafundit të numrit personal.
Me orarin e ri, qytetarët kanë të drejtë të qarkullojnë 90 minuta paradite dhe 90 minuta pasdite. Sipas arsyetimit të MSH-së kjo u bë pasi numri i rasteve të reja me koronavirus në vend ka shënuar rënie, ndërsa është regjistruar numër më i madh i të shëruarve.
Ministri i Shëndetësisë, Arben Vitia ka deklaruar se qytetarët nuk duhet të relaksohen, por të vazhdojnë t’i respektojnë masat e qeverisë dhe rekomandimet e Institutit Kombëtar të Shëndetit Publik.
IKSHPK mbrëmë ka njoftuar për 38 raste të shëruara dhe 10 raste të reja me coronavirus në Kosovë.
Aktualisht janë gjithsej 823 raste me 336 të shëruar dhe 22 të vdekur.
