Përfaqësues të bizneseve turistike të Lezhës kanë zhvilluar sot një takim me Këshillin Drejtues të Shoqatës së Transportit rrugor të udhëtarëve të Kosovës.
Të dy palët, kërkuan që të gjendet një zgjidhje për pagesën e taksës në Rrugën e Kombit, pasi që do të ndikojë në rritjen e turistëve që vizitojnë Lezhën.
Në këtë takim ka marrë pjesë edhe kryebashkiaku i Lezhës, Pjerin Ndreu, i cili ka prezantuar para përfaqësuesve të bizneseve të Kosovës ofertat që i ofron Lezha për këtë sezon.
Ai tha se i kanë marrë të gjitha masat për të parandaluar përhapjen e pandemisë COVID-19, ndërsa tha se çështja e taksës për Rrugën e Kombit nuk mund të zgjidhet lehtë pasi që tashmë është private.
“Një njëri që vjen për pushime nëse për 10 euro nuk vjen atje, megjithatë ne e kemi biseduar dhe i kemi kërkuar qeverisë ndonjë kusht lehtësues, është privat tani dhe qeveria nuk e ka plotësisht në dorë tani. Duhet t’ju themi shqiptarëve të Kosovës se ne i mirëpresim, shqiptarët e Kosovës e kanë detin, më afër se në Shëngjin nuk kanë ku e gjejnë, më cilësor se Shëngjin nuk kanë ku e gjejnë dhe më lirë se në Shëngjin nuk kanë ku e gjejnë”, tha ai.
Ndërsa, kryetari i Shoqatës së Transportit rrugor të udhëtarëve të Kosovës, Ruzhdi Kurtishaj, tha se çështja e taksës duhet të diskutohet në nivel qeveritar, megjithatë u shpreh se kjo taksë është një barrierë.
“Mendoj se sot qytetarët e Kosovës e sidomos ata që e duan më tepër Shëngjinin dhe Lezhën dhe ata që kanë nevojë më tepër edhe për shkak të moshës së tyre që të udhëtojnë më afër presin edhe oferta më të mira nga ana e operatorëve turistik, përkatësisht subjekteve hoteliere. Aktiviteti ynë sa i përket taksës nuk do të përfundojë edhe sot, këtë çështje e kam diskutuar edhe me kryetarin e Komunës, me ambasadorin, me ministrat, për këtë do të punojmë të gjithë së bashku”, tha ai.
Ambasadori i Shqipërisë në Kosovë, Qemal Minxhozi, tha se Lezha ofron mundësi shumë të mira për pushime për qytetarët e Kosovës.
Ai tha se këtë vit janë duke e shikuar mundësinë që të rinjtë e të rejat nga Kosova të punojnë punë sezonale në Shëngjin.
“Kosova është me det, sepse 70 për qind e Shëngjinit shfrytëzohet nga qytetarët e Kosovës edhe po të ngjiten më sipër në Velipojë 40 përqind e pushuesve janë nga Kosova. Prandaj, Kosova nga dita në ditë po i shton numrat e prezencës në një pjesë tjetër të rëndësishme të trojeve shqiptare që është Shëngjini dhe nga ana tjetër, edhe këtë vit kemi biseduar edhe me kryetarin do shikohet mundësia e punësimit sezonal të të rinjve e të rejave nga Kosova për turizmin në Shëngjin. Nuk ka punësim vetëm në Kosovë, po ka punësim edhe në Shqipëri të kësaj kategorie shumë të rëndësishme të shoqërisë. Investitorët e Kosovës janë prezent edhe në Shëngjin me bizneset e vogla, me leje të qëndrimit të liberalizuara totalisht njësoj sikur të jenë në Prizren, Prishtinë janë edhe në Shëngjin, që punojnë pa asnjë dallim. Prandaj, Shëngjini ofron jo vetëm detin, po edhe biznesin dhe punësimin”, tha ai.
Disa nga hotelet e Lezhës kanë paraqitur ofertat e tyre, ndërsa kanë deklaruar se të gjitha masat mbrojtëse për COVID-19 janë ndërmarrë. Ndërsa, si sfidë e kanë paraqitur taksën në Rrugën e Kombit, që sipas tyre prek drejtpërsëdrejti pushuesit që shkojnë nga Kosova në Shëngjin.
Ded Malutaj nga “Prince Adriatic”, tha se taksa nuk do të ishte problem nëse do të ishte për të gjitha akset e Shqipërisë, por sipas tij taksa e Rrugës së Kombit prek drejtpërsëdrejti pushuesit nga Kosova.
Ai bëri të ditur se kanë marrë vendim që si hotel të gjithë pushuesve do t’iu rimbursohet taksa hyrëse.
“Kjo është tarifë e vendosur vetëm në Rrugën e Kombit, çka do të thotë se prek drejtpërsëdrejti pushuesit tanë nga Kosova, se po të ishte kjo tarifë me të gjitha akset e Shqipërisë atëherë është krejt normale, por problemi është që një grek vjen nga Greqia dhe futet në Tiranë dhe ai nuk ka tra, një malazez vjen nga Mali i Zi dhe futet në Tiranë dhe nuk ka tra, vjen nga Maqedonia nuk ka tra, vjen nga Kosova nuk vjen dot në Tiranë pa tra…Vendosja e këtij trau vetëm në këtë segment prek konkurrencën dhe e margjinalizon Kosovën që është tregu më i madh i joni. Unë si operator ekonomik kam marrë një iniciativë që të gjithë pushuesit që do të vijnë tek Princi këtë vit do të rimbulësohen për taksën e rrugës së kombit, për taksën hyrëse të Rrugës së Kombit. Do të thotë çdo pushues që do të vijë tek unë do të sjelli me vete faturën e rrugës dhe të nesërmen ose kur të ikën ai do të rimbulësohet”, tha ai. /KP/
