Zëvendëskryeministri i Kosovës, Besnik Tahiri, ka folur për krizën në Telekomin e Kosovës dhe emërimin e bordit të ri të kësaj ndërmarrjeje, përzgjedhja e të cilëve është bërë përmes CV.
Ai ka thënë se emrat e tyre nuk janë të lidhur me politikën.
Po është e vërtetë se sot kemi votuar në mënyrë elektronike për anëtarët e Bordit të Përkohshëm të Telekomi. Në fakt është lajm i mirë që nuk i njohim dhe i bie që nuk janë figura politike. Para se të vijë këtu bisedova me ministrin Kuçi dhe ajo çka ka ndodhur është që ministria e Ekonomisë që është përgjegjëse i ka marrë CV-ja e tyre dhe i kanë përzgjedhë këta katër persona”, ka thënë ai.
Tahiri ka shtuar se Qeveria si aksionare kryesore nuk ka mundësi ta lë një korporatë si Telekomi pa bord.
Ai ka thënë se përzgjedhja e këtyre anëtarëve është bërë përmes CV-ve.
Ndryshe, Qeveria mbrëmë ka miratuar vendimin për emërimin e Bordit të përkohshëm të drejtorëve të Ndërmarrjes Publike “Telekomi i Kosovës Sh. A”, i cili do të përbëhet nga Mehmet Berisha, Kushtrim Krasniqi, Teki Shala dhe Blerim Shehu.
Sipas ZKM’së, emërimi i këtij bordi është bërë në përputhje me legjislacionin në fuqi për ndërmarrjet publike dhe pas dorëheqjes së Bordit të përkohshëm të kësaj ndërmarrjeje. Ky bord i përkohshëm do të shërbejë në cilësi të Bordit të drejtorëve derisa të zgjedhet Bordi i përhershëm.
