Gjithçka ishte menduar të jetë në nivel të lartë. Pas një konference me dy njerëzit më të fortë në BE, kancelaren gjermane, Angela Merkel, dhe presidentin e Francës, Emanuel Macron, Brukseli ishte caktuar si destinacioni i radhës për vizita të kryeministrit të Kosovës, Avdullah Hoti, dhe presidentit të Serbisë, Aleksandar Vuçiq.
Ata në Bruksel do të ftoheshin së pari në darkë nga presidenti i Këshillit Evropian, Charles Michel, në praninë e përfaqësuesit të lartë të BE-së për Politikë të Jashtme dhe Siguri, Josep Borrell. Ajo darkë do të zhvillohej të shtunën dhe do të tregonte se sa lart në agjendë të BE-së është dialogu për normalizimin e raporteve mes Kosovës dhe Serbisë. Michel është shumë i zënë me llogaritjet se kush sa do të paguajë dhe si do të shpenzohen afër 2000 miliardë euro nga buxheti i ardhshëm shtatëvjeçar i BE-së dhe fondi për rimëkëmbje pas krizës. Ai edhe në këtë situatë do të gjente kohë për Kosovën dhe Serbinë. Një ditë më pas, të dielën, më 12 korrik, në selinë e Shërbimit të Jashtëm të BE-së, EEAS, do të zhvillohej edhe takimi formal i palëve me çka do të konsiderohej edhe formalisht se ka rifilluar dialogu i ndalur për më shumë se 18 muaj. Pasi aty afër është edhe presidentja e Komisionit Evropian, Ursuila van der Leyn, e cila ka vendosur të jetojë në selinë e Komisionit Evropian një apartament të vogël të improvizuar, ka pasur ide që edhe ajo t’i ftojë dy mysafirët, Hotin dhe Vuçiqin, për takim në selinë e Komisionit Evropian, shkruan KOHA Ditore.
Por, ky takim i së dielës nuk do të ndodhë. Ka disa ditë që disa diplomatë në BE pohojnë se “duket se kryeministri i Kosovës ka telashe për të ardhur në takim dhe ne po e inkurajojmë të vijë”. Madje, besonin se pasigurinë që e ka për shkak të situatës në Kosovë do ta tejkalojë pas inkurajimeve nga kancelarja Merkel dhe presidenti Macron.
Por, ishte presidenti i Serbisë ai i cili i pari dha lajmin se takimi nuk do të ndodhë të dielën. Vuçiq edhe më parë gjatë dialogut ka qenë ai që i ka dhënë lajmet se çfarë do të ndodhë dhe kur. Ai duket se ka edhe informata nga dora e parë se çfarë po ndodh edhe në Qeverinë e Kosovës. Sepse ka në qeveri njerëz të cilët besojnë se ai e jo Hoti i përfaqëson në dialog, edhe pse janë ministra në qeverinë Hoti në Kosovë. Vuçiqi ka gjetur momentin e duhur për të qëndruar tri ditë në Paris dhe dy ditë në Bruksel, kur në Beograd vazhdojnë protestat kundër tij, për të cilat ai ka fajësuar “agjenturat e huaja dhe mediat e Kroacisë”.
