Ministrja e Financave, Hykmete Bajrami, ka thënë se sot dhe nesër do të ekzekutohen pagesat e parapara nga Pakoja e Rimekëmbjes për mbi 15 mijë biznese në vend.
Bajrami ka deklaruar se pagesat e parapara për ndihmën e bizneseve të prekura nga pandemia COVID-19, janë gati të ekzekutohen në kohë rekord.
Sipas ministres Bajrami, secila firmë private do të përfitojë nga 290 euro për një punëtor të regjistruar.
“Ne e kemi dizajnu këtë masë, duke dashur të eliminojmë 100 për qind subjektivitetin e çfarëdo komisioni të jetë ai. Jemi vonuat tepër në implementim të masave. Kjo është masë që po implementohet në afat rekord. Tanimë i kemi në proces 15 mijë e 500 ndërmarrje, të gjitha brenda ditës së sotme dhe nesërme do të ndihmohen”, ka thënë Bajrami.
Ministrja u ka bërë thirrje bizneseve private që të azhurnojnë të dhënat e tyre, në mënyrë që Ministria e Financave të mos ketë telashe me ekzekutimin e mjeteve për ta.
“Unë u shfrytëzoj rastin që t’u bëjë thirrje bizneseve që të azhurnojnë të dhënat, veçanërisht numrin e xhirollogarisë. Si indikatorë kemi marrë numrin e të punësuarve. Mjetet u shkojnë bizneseve për t’u paguar pagat punëtorëve”, ka thënë Bajrami.
