Nuk ka kuorum në Kuvend për t’u votuar marrëveshjet ndërkombëtare

Kryeparlamentarja, Vjosa Osmani, ka njoftuar se në Kuvendin e Kosovës nuk ka kuorum për t’u ratifikuar disa marrëveshje ndërkombëtare.

“Nuk ka kuorum pasi duhen 80 vota”, theksoi ajo.

Tri Projektligje për marrëveshje ndërkombëtare, të cilat nuk kanë marrë votat e mjaftueshme në seancën e kaluar, pasi që janë kundërshtuar nga LVV-ja, nuk janë hedhur në votim fare, pasi që në sallë kanë qenë më pak se 80 deputetë, sa duhen për miratim të tyre.

Reklama e sponzorizuar

Në Kuvend s’pati kuorum për t’u votuar Projektligji nr. 07/L-025 për ratifikimin e Marrëveshjes ndërmjet Republikës së Kosovës dhe Asociacionit Ndërkombëtar për Zhvillim lidhur me financimin e programit – nxitja dhe lejimi i mundësive për sigurimin e ujit. 

As për votimin e Projektligjit nr. 07/L-035 për ratifikimin e Marrëveshjes së Kredisë për likuiditet të urgjencës së infrastrukturës vitale, ndërmjet Republikës së Kosovës dhe Bankës Evropiane për Rindërtim dhe Zhvillim, dhe as votimin e Projektligjit nr. 07/L-036 për ratifikimin e Kontratës Financiare ndërmjet Republikës së Kosovës dhe Bankës Evropiane për Investime për Projektin e Impiantit të Ujërave të Zeza në Gjilan.

Ndërkohë që mospjesëmarrja në votim ka lënë pa miratuar në parim i Projektligjin për Peticione. Projektligji për ndryshimin dhe plotësimin e Ligjit për Lirinë Fetare në Kosovë, nuk është hedhur në votim pasi që për të kaluar duhet shumicë e dyfishtë e cila nuk ka qenë prezentë në Kuvend.

Ndërsa më shumicë votash ka kaluar në parim Projektligjit për ndryshimin dhe plotësimin e Ligjit për Financimin e Subjekteve Politike.

Kuvendi po vazhdon punimet me shqyrtimin e parë të Projekt Kodit Civil të Republikës së Kosovës.

Projekt Kodi Civil i Republikës së Kosovës, para deputetëve është arsyetuar nga ministri i Drejtësisë, Selim Selimi. Ai ka thënë se Kodi Civil do të jetë i strukturuar në 5 libra. Libri i parë “Pjesa e Përgjithshme, libri i dytë “Detyrimet”, libri i tretë “Pronësia dhe të drejtat sendore”, libri i katërt “Familja” dhe libri i pestë “Trashëgimia”.