Testi serologjik, metodë hulumtimi për rastet me koronavirus

Prishtina është qyteti me më së shumti raste aktive të COVID-19 në atë që po konsiderohet si vala e dytë e këtij virusi.

E si rrjedhojë Qendra e Mjekësisë Familjare në Prishtinë ka nisur të bëjë edhe një hulumtim krahas testimeve që bëhen çdo ditë, raporton KOHA.

Sipas kryeshefit të kësaj qendre, Sami Uka, hulumtimi ka për qëllim që të japë një pasqyrë rreth numrit të personave që janë prekur nga virusi.

Reklama e sponzorizuar

Uka shton se në 4-mujorin e fundit testin serologjik e kanë bërë 8 mijë persona.

Ky program fillimisht, sipas tij, nisi vetëm në Qendrën e studentëve, por që rritja e kërkesës për testime bëri që ato të kryhen edhe në dy qendra të tjera, në lagjet “Ulpiana” e “Kodra e Trimave”.

Aktualisht lista e pritjes për test serologjik në kryeqytet është 2 javë.

Qytetarët që kërkojnë ndihmë mjekësore në Qendrën Kryesore të Mjekësisë Familjare tashmë kanë një rutinë ndryshe.

Tek dera hyrëse është vendosur stafi mjekësor, i cili vendos se ku duhet bërë kontrollet. Ata të dyshuar për koronavirus ndalen poshtë.

COVID-19 nuk ka lënë pa prekur edhe stafin shëndetësor, duke bërë që qendrat të përballen me vështirësi në organizim të punës.

E deri në normalizimin e situatës, Uka tregon se QKMF në Prishtinë është në pritje të rekrutimit të stafit të ri.