Bitcoin arriti një rekord të ri rekord prej rreth 50 mijë dollarësh, pasi disa nga kompanitë kryesore Fortune500 i dhanë mbështetje kriptovalutës.
Sipas CoinMarketCap, përcjell Telegrafi, kjo kriptovalutë u tregtua me 49,708.58 dollarë, ku arriti çmimin më të lartë të të gjitha kohërave.
Kriptovaluta është rritur pasi disa kompani si Tesla, MasterCard dhe BNY Mellon i dhanë mbështetje.
Ditë më parë, Tesla kishte blerë 1.5 miliard dollarë në vlerë të Bitcoinit dhe tha se së shpejti do të pranonte pagesa në këtë monedhë.
Vlera aktuale e kriptovalutës Bitcoin | Burimi: CoinMarketCap
Po ashtu, MasterCard tha se do të mbështes kriptovalutën, ndërsa BNY Mellon njoftoi se do të hapte shërbimet e saj ndaj këtyre monedhave.
Çmimi i kësaj valute është rritur më shumë se 700 për qind që nga përhapja e pandemisë COVID-19 për herë të parë në muajin mars 2020.
Rritja e kërkesës nga investitorët për kriptovalutën ka nxitur rritjen e vlerës së Bitcoinit në fillim të vitit 2021. Kërkesa u rrit nga mundësia e fitimeve më të shpejta në një botë që aktualisht dominohet me normat negative të interesit.
Aktualisht vlera e tregut e kësaj valute është 1.5 trilion dollarë, ku përbën mbi 60 për qind të tregut të këtyre valutave.
