Ministria e Arsimit dhe Shkencës (MASH) gjatë dy muajve të parë të vitit 2021, ka shpërndarë gjithsej 10 tenderë për punë të caktuara, ku shumica prej tyre u janë dhënë edhe personave privat. Madje dy prej këtyre 10 tenderëve kanë vlera të mëdha deri në mbi 2 milionë euro.
Më 22 janar 2021, MASH-i nënshkroi dy kontrata mbi dy milionëshe me dy kompani kosovare, përcjell Buletini Ekonomik.
Kontrata e titulluar “Furnizimi me pajisje për salla të sportit në shkolla të arsimit parauniversitar” i ka kushtuar Ministrisë së Arsimit dhe Shkencës gjithsej 2 milionë e 476 mijë e 544 euro. Kontrata në fjalë i është besuar punës së fabrikës së mobileve “STANDARD SH.P.K., N.N.P. STANDARD PLUS dhe STANDARD HOME FURNITURE L.L.C, që pritet të përfundojë brenda tri viteve.
Ndërkohë një tender tjetër me një shifër si të përafërt me atë të lartëpërmendurin, është edhe kontrata me titull “Furnizim me pajisje dhe ngritjen e Infrastrukturës së Qendrës për Qertifikimin e produkteve në USHAF” e cila ka pasur vlerën e parashikuar prej 2 milionë e 290 mijë eurove, dhe i është dhënë Grupit të Operatorëve Ekonomik “AP PROJECT SH.P.K., gbd Lab GmbH, gbd Zert GmbH, dhe ADA CONSULTING GROUP SH.P.K.”, me një vlerë prej 2 milionë e 270 mijë euro. Ky projekt sipas dosjes së tenderit është paraparë të përfundojë për tri vite.
Ditën e parë të vitit 2021, më 1 janar, MASH-i ka publikuar në E-prokurimi njoftimin për dhënien e kontratës 1 milionëshe me titull “Furnizim me pajisje laboratorike për arsimin parauniversitar”. Kjo kontratë më pas u nënshkrua më 7 janar nga kompania “Ndërmarja Tregtare Grafike Blendi ; N.T.P ERAMED” dhe MASH-i, me një çmim ‘më simbolik prej 1 milionëshit’, me 9 mijë e 934 euro. Edhe kjo kontratë do të zgjasë tri vite apo 36 muaj.
Gjithashtu, më 12 janar po ashtu është nënshkruar edhe kontrata “Renovimi dhe funksionalizimi i tualeteve në shkolla”, kontratë kjo e ndarë në dy Llote, e cila ka pasur një vlerë të parashikuar prej 1 milionë eurove. Lloti i parë i kësaj kontrate i është dhënë operatorit ekonomik me emër “NPN EUROING SH.P.K.” me një vlerë prej 307 mijë e 85 euro, kurse Lloti 2 është nënshkruar nga kompania “Olti Trasing SH.P.K.” me një vlerë prej 393 mijë e 743 eurove.
Për kontratën “Furnizim me ushqim dhe material hixhienik për nevojat e qendrave burimore dhe shkollave speciale” gjithashtu janë ndarë gjithsej 93 mijë e 264 euro nga buxheti i Ministrisë së Arsimit. Këtë furnizim me produkte ushqimore dhe pije në këto shkolla speciale për këtë vit dhe vitin e ardhëm do ta bëjë kompania N.H.T. “Edukimi”.
Edhe 108 mijë e 371 euro tjera, i janë ndarë edhe kompanisë “Joni Travel” për “Shërbime të transportit për QB Nëna Terezë Mitrovicë jugore dhe shkolla speciale Buzhuri i Kosovës në Mitrovicën e veriut”. Kontrata në fjalë u nënshkrua më 2 shkurt të këtij viti dhe do të zgjasë 24 muaj.
Përpos këtyre, Ministria e Arsimit është përkujdesur edhe për angazhimin e disa ekspertëve të tjerë individualë në kuadër të saj.
Tenderi “Angazhimi i ekspertit në fushën e menaxhimit te projekteve” i është dhënë kandidates Donika Osmani më 14 janar, me një vlerë prej 9 mijë e 912 euro, e cila do ta ushtrojë këtë funksion për 2 vite rresht.
Më 1 shkurt, Egzon Ibërdemaj ka nënshkruar me MASH-in kontratën “Angazhimi i një eksperti konsulent individual për ekspertizë në komponentën e njohjes dhe analizës së legjislacionit, politikat dhe procedurat lidhur me arsimin privat me qëllim të ofrimit të shërbimeve dhe produkteve cilësore në licencimin dhe rilicencimin e bartësve të arsimit privat parauniversitar”. Kontrata e përmendur ka vlerën e 9 mijë e 984 eurove dhe do të zgjasë po ashtu 24 muaj.
Në datën e njëjtë, sikurse Ibërdemaj, pra 1 shkurt 2021, u dha edhe kontrata “Shërbime të veqanta për kontraktor individual” me katër Llote edhe për 4 kontraktorë tjerë individual. Kjo kontratë më pas u nënshkrua nga kandidatët më 2 shkurt. Kontraktorët individual që fituan tenderin e ndarë në Llote për hartimin e dokumentit “Plani Strategjik i Agjencisë së Kosovës për Akreditim” janë: Fortuna Mehmeti (Lloti I), Muzafer Shala (Lloti II), Majlinda Mazelliu (Lloti III) dhe Shejnaze Gagica (Lloti IV). Të gjithë këta kandidatë do të paguhen me nga 2 mijë euro për 3 muaj.
Më datën 3 shkurt, gjithashtu është nënshkruar edhe një kontratë tjetër brenda kësaj ministrie, me vlerë mbi 33 mijë euro, për “Angazhimin me shërbime të veçanta për kontraktorë individual”, ku fituan 6 persona.
Donjeta Maqedonci është kandidatja që u caktua si “Kontraktor individual për ekspertizë në komponentën e njohjes barasvlerë së diplomave të Arsimit Parauniversitar –MASH”. Vlera e kontratës për Maqedoncin do të jetë 2 mijë e 700 euro dhe do të zgjasë për 6 muaj.
Rozafa Ramosaj u caktua si “Kontraktor individual për ekspertizë dhe trajtim të diplomave të Univeristetit të Mitrovicës së veriut”, me një vlerë të njëjtë të kontratës prej 2 mijë e 700 eurove.
Milot Hyseni u pozicionua si “Kontraktor individual për ekspertizë të diplomave të Arsimit të Lartë Privat të fituara në Kosovë – me qëllim të përdorimit të atyre diplomave jashtë Kosovës” për gjashtë muaj me vlerë po ashtu 2 mijë e 700 euro. Edhe Ernest Hasani fitoi kontratën e njëjtë si Milot Hyseni për punë gjashtë mujore në këtë institucion.
Kurse Faton Merovci dhe Arta Ahmetxhekaj fituan tenderin e “Kontraktorit individual për Informim Akademik” në vlerë të 7 mijë e 200 eurove për 12 muaj.
Ndryshe Ministria e Arsimit dhe Shkencës prej gjysmës së vitit 2020 e deri më tani është duke u qeverisur nga ministri tashmë në detyrë, Ramë Likaj. (Mirjeta Shabani)/Buletini Ekonomik/
