Zyrtarët e lartë të gjigantit amerikan të teknologjisë, Apple, njoftuan për shifra rekorde të të ardhurave, të cilat ishin edhe më të larta se pritjet e analistëve.
Të hyrat shënuan rritje për 54 për qind në krahasim me periudhën e njëjtë të vitit të kaluar dhe shkuan në gati 90 miliardë dollarë. Shitjet e kësaj kompani në Kinë u dyfishuan, shkruan The Guardian, transmeton Gazeta Express.
Shitjet e laptopëve Mac ishin për një të tretën më të larta sesa ishte parashikuar, ndërsa nga telefonat iPhone u siguruan shitje prej 48 miliardë dollarësh, rreth 6.5 miliardë dollarë më shumë sesa vlerësimet fillestare.
“Ky çerek viti i pasqyron mënyrat e qëndrueshme që produktet tona kanë ofruar për përdoruesit tanë në këtë moment në jetën e tyre si dhe optimizmin e klientëve që duket se e ndiejnë rreth ditëve më të mira që ndodhen para nesh”, tha përmes një deklarate shefi ekzekutiv i kompanisë “Apple”, Tim Cook.
Kompania e vazhdoi suksesin në fitim nga çereku i fundit i vitit të kaluar për të shënuar fitim prej hiç më pak se 23.6 miliardë dollarësh.
