Ministria e Punës, Financave dhe Tranfereve ka dal me një sqarim për arsyen se pse dje u publikua lista me 50 bizneset që kanë përfituar më së shumti nga Programi i Rimëkëmbjes Ekonomike.
Përmes një komunikate drejtuar mediave, Ministria ka thënë se publikimi i kësaj liste është bërë në frymën e transparencës dhe në zbatim të marrëveshjes financiare ndërkombëtare me Bashkimin Evropian të nënshkruar dhe ratifikuar në Kuvend
“Ministria e Financave, Punës dhe Transfereve njofton opinionin publik se bashkangjitur me këtë komunikatë mund të gjejnë listën e 50 bizneseve që përfituan nga Programi i Rimëkëmbjes Ekonomike të dizajnuar dhe ekzekutuar nga Qeveria e kaluar në tetor 2020.
Ky publikim i kësaj liste është bërë në frymën e transparencës, po ashtu edhe në zbatim të marrëveshjes financiare ndërkombëtare me Bashkimin Evropian të nënshkruar dhe ratifikuar në Kuvend”, thuhet në komunikatë.
Ndryshe, në pakon prej 60 milionëve, një prej përfituesve është edhe Grupi Koha, si media që ka përfituar më së shumti para nga kjo pako.
Grupi Koha ka përfituar 70 mijë e 775 euro nga Pako e Rimëkëmbjes, të ndara nga Qeveria Hoti në muajin tetor të vitit 2020.
Në këtë listë figuron edhe “Dukagjini shpk” me 73 mijë e 385 euro, por kompania, përveç mediumit përfshin edhe biznese të tjera si hoteleri, ndërtimtari e të tjera, derisa biznesi i Grupit Koha, sipas të dhënave në ARBK përfshin vetëm televizionin, shtypshkronjën dhe gazetën.
