Deputetja e LVV-së dhe njëherësh edhe anëtarja e Komisionit për Ekonomi, Tregti dhe Industri, Mimoza Kusari-Lila, gjatë mbledhjes së djeshme të këtij komisioni, ka ngritur dyshimet e saja rreth rritjes ilegale të konsumit të energjisë elektrike në komunat veriore të populluara nga serbët.
Kusari-Lila tha se është për hetim çështja se si në veri konsumi i energjisë elektrike për këtë vit është rritur për 20 për qind përderisa nuk është regjistruar rritje e popullsisë në atë pjesë. Ajo dhe anëtarët e tjerë të LVV-së në këtë komision, hodhën dyshimet për konsum ilegal të energjisë e cila për vite me radhë vazhdon të paguhet nga buxheti i Qeverisë së Kosovës.
Sipas saj, në katër komuna të Kosovës, ekziston një vrimë e zezë, e cila po vazhdon të shkaktojë disbalanc, në këtë rast tek KOSTT-i, prandaj ajo ka kërkuar që për këtë konsum të pambuluar në veri të kërkohet një hetim nga organet e sigurisë pasi ka rritje të vazhdueshme të konsumit në këtë pjesë.
“Ne nuk kemi pasur shtim të popullsisë në veri, nuk kemi pasur zyrtarisht shtim të aktivitetit ekonomik, që do të thotë se kemi ilegalisht shtim të konsumit të energjisë. A janë operatorë nga jugu, që shkojnë nga jugu të prodhojnë apo kush është duke e konsumuar rrymën në veri?”, u shpreh Kusari-Lila.
Ndryshe, deri në vitin 2017 faturat e shpenzimit të energjisë nga serbët i ka paguar konsumatori kosovar, ndërsa nga 2017 i paguan Qeveria, përkatësisht KOSTT-i.
Së fundi, KOSTT-i ka kërkuar nga Kuvendi ndarjen e 11 milionë eurove të tjera për këtë qëllim, kërkesë për të cilën deputetët anëtarë të Komisionit nuk u pajtuan.
“Nëse e shihni në kërkesë të dhjetorit të vitit të kaluar, KOSTT-i kanë kërkuar 15 milionë euro. Qeveria e Avdullah Hotit u ka dhënë 10 milionë euro. Tash ata po kërkojnë edhe 11 milionë të tjera. Këta janë duke bërë hajgare”, ka thënë Armend Muja, kryetar i Komisionit për Ekonomi. /Buletini Ekonomik/
