Banka e Shqipërisë zhvilloi të premten ankandin e radhës në programin vjetor të blerjeve të Euros në tregun valutor.
Sipas informacioneve nga tregu, në ankand u blenë gjithsej 10.7 milionë Euro, ndërsa ofertat e paraqitura nga pjesëmarrësit në ankand kishin shumën totale të 14.4 milionë Eurove.
Shuma e parashikuar për t’u blerë në raundin e parë të ankandit ishte mes 4 dhe 6 milionë Eurove dhe Banka e Shqipërisë vendosi të blejë në shumën e intervalit të sipërm të parashikuar, prej 6 milionë Eurosh. Blerjet në raundin e parë u realizuan me një kurs që ishte mes 122.25 dhe 122.33 Lekëve.
Veç gjashtë milionë Eurove në raundin e parë, Banka e Shqipërisë ushtroi edhe opsionin e blerjes në një raund të dytë, për 4.7 milionë Euro të tjera. Blerjet në raundin e dytë u realizuan me kursin mesatar të ponderuar të raundit të parë, prej 122.3 Lekësh.
Të dhënat e kursit të këmbimit tregojnë se as ankandet e Bankës së Shqipërisë për blerjen e Euros nuk kanë ndikuar në frenimin e tendencës së nënccmimit të Euros në tregun valuator. Të premten, Euro u këmbye me 122.24 Lekë, duke shënuar vlerën më të ulët në periudhën e post-pandemisë. Leku ka nisur një cikël të lehtë mbiçmimi ndaj Euros qysh në muajin mars, por me ardhjen e verës ky mbiçmim po ecën me hapa më të shpejtë.
Blerjet e valutës nga Banka e Shqipërisë bëhen në funksion të menaxhimit të rezervës valutore dhe nuk kanë për qëllim të ndikojnë kursin e këmbimit. Në fund të muajit maj, rezerva valutore e Bankës së Shqipërisë kishte vlerën e 3.96 miliardë Eurove, 12% më shumë krahasuar me të njëjtën periudhë të vitit të kaluar.
Për këtë vit janë planifikuar 14 ankande dhe në total, shuma e parashikuar për t’u blerë në raundin e parë është deri në 84 milionë Eurove. Por, zakonisht Banka e Shqipëris ëushtron edhe opsionin e blerjes në raundin e dytë, ndaj shumat e blera priten të jenë më të mëdha.
Blerjet e Euros nga Banka e Shqipërisë u rritën ndjeshëm pas vitit 2017 dhe arritën shifrën rekord të gati 155 milionë Eurove në vitin 2019. Kjo tendencë u frenua vitin e kaluar, kur për shkak të krizës së Covid-19 u zhvilluan vetëm dy ankande, për një shumë totale të blerë prej 13.7 milionë Eurosh. Këtë vit, kjo shumë u tejkalua qysh në tremujorin e parë, kur banka e Shqipërisë bleu gjithsej 16.1 milionë Euro.
Këtë vit, Banka e Shqipërisë po aplikon rregulloren e re “Për ndërhyrjet në tregun e brendshëm valutor”. Ndryshe nga rregullorja e mëparshme, që parashikonte se në ankande mund të merrnin pjesë vetëm bankat ose degët e bankave të huaja, rregullorja e re lë hapësira që në ankande të marrin pjesë edhe zyrat e këmbimit valutor, nëse kjo vlerësohet e nevojshme nga Banka e Shqipërisë. Për pjesëmarrësit në ankand është hequr shuma tavan prej 5 milionë Eurosh e parashikuar në rregulloren e mëparshme, ndërsa për pjesëmarrje kërkohet vetëm një shumë minimale në vlerën 100 mijë Euro ose ekuivalentin në monedha të tjera./monitor.al/
