Agjencia e Ushqimit dhe Veterinarisë (AUV) nuk ka kurrfarë dokumentacioni mbështetës burimor për gjithsej 993 mijë e 580 euro pasuri kapitale.
Nga Zyra Kombëtare e Auditimit (ZKA) thonë se me rastin e auditimit të këtij institucioni gjatë 2020-s, nuk kanë marrë dëshmi audituese për pasurinë kapitale në vlerë të rreth 1 milionë eurove të regjistruar tek para vitit 2010, si dhe nuk ka pasur mundësi të bëjë ekzaminimin fizik edhe të disa pasurive tjera në vlerë të 18 mijë e 394 eurove.
Për 54 nga 71 mostra të pasurisë, të përzgjedhura për testim nga ZKA-ja, me vlerë të përbashkët prej 993,580€ të cilat janë të paraqitura në regjistrin e pasurisë kapitale, Agjencia e Ushqimit dhe Veterinarisë (AUV) nuk ka ofruar fare dokumentacion mbështetës për to, përcjell Buletini Ekonomik.
“Për 54 nga 71 mostra të pasurisë, të përzgjedhura për testim me vlerë të përbashkët prej 993,580€ të cilat janë të paraqitura në regjistrin e pasurisë kapitale, Agjencia e Ushqimit dhe Veterinarisë (AUV) nuk ka ofruar dokumentacion mbështetës për to. Këto pasuri ishin të regjistruara në vitet e mëhershme (para vitit 2010)”, thuhet në raportin e ZKA-së.
Si pasojë e mungesës së dokumenteve burimore të pasurive, gjatë ekzaminimit fizik të tyre, ZKA thotë se edhe për pesë (5) raste tjera me pasuri në vlerë neto kontabël prej 18 mijë e 394 euro, të pasurisë mbi 1,000 euro, zyrtarët e AUV nuk ishin në gjendje të identifikonin parapë fizikisht pasuritë.
Kështu, prej tyre, klima komora me numër të njëjtë serik ishte e regjistruar dy herë në SIMFK me vlerë neto kontabël prej 12 mijë e 825 eurove. E gjithë kjo kishte ndodhur për shkak të kontrolleve të dobëta në ruajtjen e dokumentacionit të pasurisë dhe mungesës së barkodeve, konstatojnë nga ZKA-ja.
Ndërkohë, sipas Nenit 2 të rregullores për menaxhimin e pasurisë jo financiare të gjitha organizatat buxhetore janë të obliguara që të marrin masat e nevojshme për dokumentimin, ruajtjen, evidentimin, tjetërsimin dhe raportimin e pasurisë jo financiare me qëllim të menaxhimit më efektiv, efikas dhe ekonomik, me qëllim të mbrojtjes së pasurisë jo financiare nga dëmtimi dhe keqpërdorimi.
Por, mungesa e dokumenteve mbështetëse për pasuritë e paraqitura në regjistër rritë rrezikun që pasuria të keqpërdoret, humbet apo të tjetërsohet si dhe vlera e pasurisë së organizatës e paraqitur në pasqyra financiare të mos jetë e saktë.
Prandaj, Auditori rekomandon që Sekretari i Përgjithshëm dhe Kryeshefi Ekzekutiv i AUV-it duhet të sigurojnë se janë forcuar kontrollet në menaxhimin e pasurisë, në mënyrë që për tërë pasurinë në regjistër të ketë dokumentacion mbështetës. Kurse për t’u bërë më i lehtë identifikimi, të gjitha pasuritë duhet të jenë të pajisura me barkode në bazë të regjistrit të pasurive.
Gjithashtu, përveç këtyre, edhe një pjesë e pasurisë së këtij institucioni, më saktësisht pasuria në vlerë bruto prej 119 mijë eurove nga AUV-i ishte regjistruar gabimisht si pasuri në përdorim, ndonëse është dashur të regjistrohet si investim në vijim.
Ndërkaq, në 35 raste tjera me vlerë prej 254 mijë e 572 eurove, urdhërblerjet nga Auv-i ishin proceduar tek pas pranimit të faturës. Auditori thotë se këto raste kishin ndodhur tek pagesat për shërbime të identifikimit të kafshëve, matrikulimin e gjedheve, analiza laboratorike, pajisje, etj.
E shkaku i dobësive në procedimin e pagesave kishte ndodhur si rezultat i kontrolleve të dobëta në procesin e realizimit të blerjeve, porse procedimi i pagesave si më sipër, paraqet shmangie të procedurave të përcaktuara me rregullat financiare dhe rritë rrezikun që të pranohen mallra apo shërbime jo në pajtim me kushtet e kontraktuara.
Agjencia e Ushqimit dhe Veterinarisë, e cila funksionon në kuadër të Kryeministrisë, shquhet edhe për mospagesa të obligimeve brenda afatit ligjor.
Sipas ZKA-së, në 45 mostra të testuara në ZKM dhe AUV me vlerë prej 530 mijë e 422 eurove, është vërejtur se faturat nuk ishin paguar brenda afatit ligjor prej 30 ditësh. Vonesat kryesisht ishin deri në 90 ditë, ndërsa njëra prej tyre në AUV ishte obligim i papaguar që nga viti 2018. Shkaku i dobësive në procedimin e pagesave me vonesë ishin kontrollet e dobëta në menaxhimin të buxhetit, si dhe neglizhenca në likuidimin e faturave me kohë.
Mirëpo, mospagesa e obligimeve brenda afatit ligjor, sipas ZKA-së rritë mundësinë që furnitorët t’i drejtohen përmbaruesve dhe gjykatave, dhe ekzekutimi i detyrimeve përmes këtyre procedurave mund të krijojë shpenzime shtesë për buxhetin e ZKM. (Mirjeta Shabani) /Buletini Ekonomik/
