Dosja voluminoze e Prokurorisë për aferën tashmë të njohur si “Subvencionet 2021”, shfaqi dyshime të shumta korruptive.
Brenda kësaj dosjeje përshkruhet se si inspektoret kishin përpiluar raporte të rreme deri në atë masë sa kishin përshkuar se në një vend në Istog ishin mbjellë grurë dhe misër në një sipërfaqe të madhe e cila ndodhej në pyll.
Prokuroria shfaqë dyshimet se një inspektor i Agjencia për Zhvillimin e Bujqësisë kishte përpiluar një raport në të cilin kishte konstatuar se një fermer kishte mbjellë grurë dhe misër në një zonë e cila në realitet ndodhet në pyll.
Dyshimet shkojnë deri në atë nivel sa përshkruhet se marrëveshjet në mes të fermerëve dhe zyrtarëve të AZHB-së për një subvencion shkonin deri në 70% me 30% në favor të zyrtarëve.
Dosja e Prokurorisë përshkruan se zyrtarët e AZHB-së merreshin vesh me fermerë që të ndanin shumën e parave të subvencioneve përgjysmë e në disa raste shuma e parave është ndarë 70% për zyrtarët dhe 30% për fermerët.
Për këto dyshime, dy ditë më parë, nën pranga përfunduan 21 persona në mesin e të cilëve edhe grua, që dyshohet se kishin përfituar subvencione duke dhënë ryshfet.
Përpilimi i raporteve të rreme të kontrollit, shtimi i numrit të bagëtive dhe shtimi i numrit të bletëve, kanë qenë disa nga metodat të cilat dyshohet se janë përdorur nga inspektoret e AZHB-së për të marrë ryshfet.
Dosja voluminoze e Prokurorisë të cilën e ka siguruar KALLXO.com, tregon për dyshimet se si inspektoret e Ministrisë kishin përpiluar raporte të rreme kontrolli të cilat në të vërtetë nuk ekzistonin.
Përmes raporteve të rreme të përpiluara nga inspektoret e ministrisë, fermerë të ndryshëm pasi kishin dhënë ryshfet, dyshohet se kishin përfituar subvencione në vlerë prej qindra e mijëra eurove.
Mënyra më e shpeshtë e keqpërdorimit që dyshohet të jetë përdorur, përmendet rritja e numrit të sipërfaqes me të mbjella e cila në realitet ishte shumë herë më e vogël.
Përmes dhënies së ryshfetit për zyrtarë të AZHB-së, K.B dyshohet se kishte arritur që të përfitojnë mbi 370 mijë euro subvencione.
Mbi 200 mijë euro përmes kësaj skeme dyshohet t’i ketë përfituar së bashku me bashkëshorten e tij fermeri B.Sh.
Njëjtë përfituan edhe fermerët H.K dhe F.M. Ata dyshohet se përmes kësaj skeme kishin arritur që të përfitonin secili mbi 100 mijë euro.
Muaj më parë në një aksion të gjerë policor të udhëhequr nga prokurori Rafet Halimi, ishin arrestuar zyrtarë të lartë të Ministrisë.
Dosja e prokurorisë tregonte se si një pjesë e këtyre zyrtarëve po thurnin planet për të përfituar më shumë në të ardhmen.
Përveç 11 personave të arrestuar muaj më parë, ishin sekuestruar edhe shuma të majme të parave që tejkalonin 600 mijë euro.
KALLXO.com e ka siguruar dosjen e Prokurorisë së Prishtinës ku shfaqën edhe planet e zyrtarëve të Ministrisë së Bujqësisë për të marrë ryshfet gjatë vitit 2021.
Në dosjen e siguruar thuhet se në zyrën e Statovcit përpos që është diskutuar për marrjen e ryshfetit nga aplikuesi V.K, janë thurur edhe plane për të marrë ryshfet gjatë vitit 2021.
Madje sipas Prokurorisë të dyshuarit Berat Nika dhe Hasan Maxharraj janë dëgjuar tek bëjnë plane që në vitin 2021 të marrin ryshfet shuma të parave prej 25 mijë eurove për aplikues.
Prokuroria pretendon se ka siguruar prova të fuqishme në këtë rast, duke përfshirë fotografi dhe incizime të momenteve të dorëzimit të parave.
Pos tjerash, Prokuroria pretendon se ka arritur të sigurojë prova ku shihet se Adushe Ukshini e cila është inspektore në AZHB ka pranuar shuma të ndryshme si ryshfet dhe të njëjtat shihet duke ia dërguar drejtorit Luan Statovci dhe duke i ndarë mes vete.
Gjatë bastisjeve janë sekuestruar rreth 433,160 euro, 600 dollarë, 200 franga, 275 lira turke, 15 telefona, 8 vetura, një kompjuter, pesë armë, një USB dhe një vulë.
