Mbi 60% e punëtorëve të sektorit privat në Kosovë janë pa kontrata pune.
Kështu ka thënë kryetari i Sindikatës së Pavarur të Sektorit Privat, Jusuf Azemi. Ai ka treguar se sindikata dhe punëtorët e sektorit privat janë të mllefosur me punën e institucioneve shtetërore, derisa ka shtuar se punëtorët e sektorit privat po punojnë për një pagë prej 170 euro.
Kryetari i Sindikatës së Pavarur të Sektorit Privat, Jusuf Azemi ka thënë se si rezultat i mos zbatimit të ligjeve, punëtorët e sektorit privat po lëshojnë vendet e tyre të punës dhe po kërkojnë një jetë më të mirë jashtë Kosovës.
Azemi ka thënë punëtorët e sektorit privat janë të zhgënjyer me Qeverinë e Kosovës, që sipas tij, nuk po realizon asnjë nga premtimet e bëra lidhur me këtë kategori.
“Si rezultat i mos-zbatimit të ligjit dhe ligjeve të tjera që kanë të bëjnë në raport punëtor dhe punëdhënës, ju vetëm jeni të njoftuar që një pjesë bukur e madhe e punëtorëve të sektorit privat janë duke lënë vendet e tyre të punës dhe janë duke marrë orientimin e padëshiruar dhe po shkojnë në mërgim. Megjithatë kemi një pjesë bukur të madhe të punëtorëve që po i lirojnë vendet e tyre të punës meqë nuk ja vlen barra qiranë sepse shpenzimet të cilat i bënë gjatë shkuarjes në punë dhe kthimit nuk ia vlen, kështu që nga vet deklarimi i pronarëve të kompanive tani kemi informacione se disa kompani veç kanë filluar të mbyllen në mungesë të punëtorëve”, ka thënë Azemi.
Ai ka thënë se punëtorët e sektorit privat janë të mllefosur dhe zhgënjyer me Qeverinë Kurti, derisa kërkoi që punëtorët teknikë të stimulohen me shtesë për shkak të pandemisë COVID-19.
“Jemi tepër të zhgënjyer me bashkëpunimin, nuk kemi dialog të mirëfilltë dhe në fakt mund të themi që lëvizjet e Qeverisë së Kosovës në raport me punëtorët e sektorit privat deri më tani janë zero. Paramendojeni që për pesë muaj ditë, paga minimale nuk e lëkundi as për një cent. Kemi edhe një kërkesë, që ta kenë parasysh, tani pandemia ka marrë një hov të madh, mendoj që edhe mjekëve, edhe punëtorëve teknikë dhe të arsimit duhet t’u bëhet një stimulim shtesë por krahas atyre, patjetër duhet të kenë stimulimin shtesë edhe punëtorët teknikë, edhe punëtorët e spitaleve, edhe shkollave”, ka shtuar ai.
Azemi i ka kujtuar kryeministri Albin Kurti premtimet e tij lidhur me punëtorët e sektorit privat, për të cilat ka thënë se nuk janë as afër të realizohen.
“Ka premtuar që paga minimale të jetë 350 euro dhe në fakt ajo as që po bisedohet për të, ka premtuar punëtorët e sektorit privat që do të bëjmë nënshkrimin e marrëveshjes kolektive dhe marrëveshje kolektive nuk ka dhe as që po bisedohet për të. Ka premtuar rritjen e numrit të inspektorëve të punës dhe nuk e ka bërë dhe as që është duke e bërë, as që po bisedohet për të. Pagesa për humbjen e vendeve të punës gjatë pandemisë sot në fakt është shuar dhe nuk ekziston kurrkund. Dialogu që gjithherë është trumbetuar se kjo qeveri do të jetë afër sektorëve të punëtorit privat dhe të tjerë, unë u bëj me dije sepse Qeveria e Kosovës për punëtorët e sektorit privat që nga ardhja në pushtet e deri më tani jo që i ka ndihmuar por përndryshe e ka sanksionuar”.
Azemi ka treguar se punëtorët e sektorit privat po punojnë për një pagë prej 170 euro, e që sipas tij shumica prej tyre janë duke lëshuar vendin.
“Sindikata është e mllefosur me formën dhe vazhdën e punimeve te institucionet shtetërore të Kosovës dhe ne kemi ofruar disa pakënaqësi tona që mendojmë se jemi të rënduar. Punëtorët e sektorit privat janë të mllefosur pasi që qeveria e Kosovës bëri pagesën e rrymës për popullatën e serbëve në veri, andaj ka krijuar një mllefosje të madhe që ne nuk e kemi pasur borxh. Ne punojmë për një pagë prej 170 euro. Një pjesë e madhe e punëtorëve të sektorit privat janë duke lënë vendin e punës dhe po shkojnë drejt vendeve të tjera”.
Përkundër rritjes ekonomike që po thotë Qeveria, ai thotë se përse nuk po ndodhë edhe rritja e pagës minimale.
“Qeveria po thotë se kemi rritje ekonomike prej 7%, por neve nuk na intereson por neve na intereson se përse nuk kemi rritje të pagës prej 170 euro dhe deri kur ne duhet të punojmë për serbët dhe për sektorin publik. Nga mos kontrollet e inspektoratit kemi grupime të mëdha të punëtoreve të paregjistruar dhe janë duke kryer shërbime pa asnjë licencim dhe mbi 60% e punëtorëve që punësojnë në Kosovë janë pa kontrata të punës”. Azemi ia ka përkujtuar kryeministrit Albin Kurti disa premtime për të cilat thotë se nuk i ka realiozuar.
Ai ka thënë se Kurti ka premtuar pagë minimale 350 euro dhe as që po bisedohet për të, ka premtuar nënshkrimin e marrëveshjes kolektive, rritjen e numrit të inspektorëve të punës, pagesën për humbjen e vendit të punës për shkak të pandemisë, dialogun me sektorin privat që është trumbetuar dhe sipas tij, asgjë nuk ka realizuar nga këto.
