Kosova vendosë të aplikojë në WBIF për masa të efiçiencës në sektorin rezidencial dhe privat.
Gjatë mbledhjes së pestë të Komisionit për Planifikim Strategjik, nën kryesimin e Kryeministrit Albin Kurti, është miratuar propozimi i Ministrisë së Ekonomisë për aplikim në kuadër të rundit 26-të të asistencës teknike të Kornizës Investuese të Ballkanit Perëndimor (WBIF), për masat e efiçiencës së energjisë në sektorin rezidencial dhe privat.
‘Projekt propozimi ‘Masat e efiçiencës së energjisë në sektorin rezidencial dhe privat’ do të koordinohet nga Zyra e Kryeministrit deri në dorëzim të aplikacionit për asistencë teknike nga grantet investuese të WBIF. Projekti është paraparë të menaxhohet nga Fondi i Kosoves per Efiçience te Energjise (FKEE)’, ka shkruar Ministria e Ekonomisë në rrjete sociale.
Korniza Investuese e Ballkanit Perëndimor (WBIF) mbështet zhvillimin socio-ekonomik dhe integrimin në BE të Ballkanit Perëndimor, përmes ofrimit të mbështejtes financiare dhe teknike për investime strategjike në fushën e energjisë, mjedisit, transportit dhe infrastrukturë.
Nisma mbështet edhe iniciativat tjera të zhvillimit të sektorit privat dhe është nismë e përbashkët e BE-së, institucioneve financiare, donatorëve dhe qeverive të Ballkanit Perëndimor.
