Elon Musk ka avancuar në renditjen e miliarderëve botërorë. CEO i Tesla dhe SpaceX nuk është aktualisht vetëm personi më i pasur në botë, por tani vlen sa miliarderët Bill Gates dhe Warren Buffett së bashku.
Pasuria neto e 50-vjeçarit është 230 miliardë dollarë, sipas Indeksit të Miliarderëve të Bloomberg. Gates zë vendin e katërt me 130 miliardë dollarë dhe Buffett është nr. 10 me 102 miliardë dollarë.
Gates dhe Buffett më parë mbanin mantelin e personit më të pasur në botë. Musk kaloi së pari CEO-n e Amazon Jeff Bezos për t’u bërë njeriu më i pasur në botë në janar me një pasuri neto prej 185 miliardë dollarësh. Bezos e mbante titullin që nga viti 2017.
Musk ka shtuar më shumë se 60 miliardë dollarë në pasurinë e tij këtë vit falë performancës së fortë të aksioneve të Tesla si dhe shitjes së aksioneve të fundit në SpaceX e cila e vlerësoi kompaninë në 100 miliardë dollarë. Marrëveshja e SpaceX shtoi 11 miliardë dollarë në pasurinë neto të Musk, sipas Bloomberg.
Bezos, i cili kohët e fundit ishte marrësi i ‘shakasë’ të Musk kur ekzekutivi i Tesla i dërgoi një emoji medalje argjendi tek ai, është ende personi i dytë më i pasur në botë me një pasuri neto 191 miliardë dollarë.
Sigurisht, Gates dhe Buffett do të ishin shumë më afër Musk në renditjen e pasurisë, po të mos ishte për dhurimin filantropik të dyshes. Të dy kanë dhënë dhjetëra miliarda dollarë për kauza bamirësie gjatë viteve, ndërsa Musk është kritikuar se nuk ka dhënë më shumë nga pasuria e tij masive.
Musk ka thënë më parë se preferon të mbetet anonim kur jep para, dhe në fillim të këtij viti u kërkoi përdoruesve të Twitter “reagime kritike” për mënyrat se si ai mund të dhurojë.
Këtë vit, Musk gjithashtu u zotua të japë 150 milion dollarë, përfshirë një çmim prej 100 milion dollarësh në një konkurs për heqjen e karbonit, një shifër që Recode vlerëson se është më e madhe se të gjitha dhurimet e tij të mëparshme bamirëse.
