Eurostat: Vetëm Ukraina ka çmime më të lira të rrymës se sa Kosova në Evropë

Eurostat, agjencia e BE-së për statistika, ka përditësuar të dhënat mbi çmimin e energjisë elektrike në Evropë. Sipas të dhënave të reja, Kosova zë vendin e dytë për çmimin më të lirë të rrymës në Evropë dhe të parin në rajon. Në Kosovë çmimi i energjisë elektrike është 0.0605 euro për kWh.

Çmimi aktual dallon nga çmimi i raportuar nga Eurostat në maj të kwtij viti, kur Kosova shënonte mbase një çmim të ngjajshëm prej 0.0608 euro për KWh.

Ndërkaq, të dhënat e reja të publikuara nga Eurostat në tetor të këtij viti për çmimet e energjisë elektrike në pjesën e parë të vitit 2021 theksojnë se Ukraina ka çmimin më të lirë të rrymës në Evropë, me vetëm 0.0485 për kilovat orë.

Reklama e sponzorizuar

Pas Ukrainës, vendi me çmimin më të lirë të rrymës është Kosova me vetëm 0.0605 euro për kilovat orë ndërsa çmimi më i lartë i energjisë elektrike në Evropë është regjistruar në Gjermani me 0.3193 euro dhe Danimarkë me 0.29 euro për kilovat orë.

Çmimi i rrymës në Gjermani del të jetë pesë here më i lartë se çmimi i rrymës në Kosovë.

Ndërsa vendet tjera të rajonit kanë çmime shumë më të shtrenjta, në rajon Kosova prinë me çmimin më të lirë të rrymës

Vendin e dytë (pas Kosovës) në rajon për çmimet më të lira të rrymës në rajonin e Ballkanit Perëndimor e zë Serbia, ku çmimi i energjisë elektrike për kilovat orë është 0.0791 euro. Pas Serbisë në listë prinë Bosna dhe Hercegovina me 0.0875, Mali i Zi me 0.098, Kroacia me 0.1291 dhe Sllovenia me 0.16662 euro për kilovat orë.

Të dhënat e publikuara nuk përfshijnë informata mbi çmimin e energjisë elektrike në Maqedoninë e Veriut apo Shqipërinë.

Në përllogaritjen e të dhënave, Eurostat ka përfshirë edhe taksat dhe TVSH-në.

Eurostat në vazhdimësi përcjell ndryshimet e çmimeve të energjisë elektrike si brenda ashtu edhe jashtë Bashkimit Evropian dhe është përgjegjëse për publikimin e statistikave me cilësi të lartë në mbarë Evropën që mundësojnë krahasime midis vendeve dhe rajoneve.