Zagreb, tetor – Në Zagreb po zhvillohen bisedimet për nisjen e rregullt të linjës ajrore Zagreb-Prishtinë, e cila parashihet të funksionojë tre herë në javë.
Këtë nismë e ka përkrahur ministri Oleg Butkoviq, ndërsa kryeministri Andrej Plenkoviq e ka vlerësuar si një hap shumë të rëndësishëm “ i cili do të ndikonte pozitivisht në turizëm dhe në ekonomi”.
Siç shkruan e përditshmja zagrebase ‘Jutarnji list’, mbledhja e parë në këtë temë është mbajtur dje me ministrin Butkoviq.
Ministri, ka transmetuar gazeta, ka shprehur interesim dhe gatishmëri për përkrahje të fuqishme të këtij projekti dhe njëkohësisht ka biseduar me drejtorin e Aeroportit Ndërkombëtar të Zagrebit, i cili gjithashtu “ka shprehur përkrahjen maksimale”.
Për të gjitha çështjet rreth kësaj nisme ka qenë i informuar edhe kryeministri kroat Andrej Plenkoviq, i cili linjën potenciale ndërmjet Prishtinës dhe Zagrebit e ka vlerësuar si “ një hap shumë të rëndësishëm dhe si urë ndërlidhëse ndërmjet dy shteteve , që do të ndikojë pozitivisht në turizëm dhe në ekonomi”.
Plani inicues parasheh nisjen e linjës ajrore në relacionin Zagreb-Prishtinë tre herë në javë, me aeroplanët të tipit A319, të cilët firma private kroate i ka angazhuar para pak muajsh. /Përktheu: Buletini Ekonomik/
