Kryeministri i Kosovës, Albin Kurti, ia ka ofruar mbështjetjen e Qeverisë ushtruesit të detyrës së kryeshefit të ndërmarrjes “Trepça”, Enis Abdurrahmani, pasi i njejti pësoi sulm në vendin e punës gjë që të dyshuar janë punëtorë të kësaj ndërmarrjeje.
Mënjeherë pas vizitës në “Trepçë”, bashkë me ministren e Ekonomisë, Artane Rizvanolli, ata kanë premtuar investime milionëshe në këtë ndërmarrje publike.
Kurti gjithashtu ka thënë se në bazë të informatave që ka, në Trepçë ka pasur prodhim të madh me nxjerrje të 20 mijë ton të xeheve.
“Është lajm i mirë për Trepçën që çmimet e metaleve janë ngritur. Plumbit e zinkut të larta si rrallëherë. Mbi 3500 dollarë për ton zinku dhe 2500 dollarë për ton plumbi. Jemi të lumtur që kur ishim në qeverisje pranverën e kaluar e kemi dëshmuar edhe te udhëheqja edhe te punëtorët se jemi të interesuar për Trepçën. E kemi bërë konkretisht e materialisht. I patëm ndarë mbi 7 milionë euro për Trepçën. Në dy vitet në vijim do t’i ndajmë 70 milionë euro për investime në Trepçë për vitet 2022-2023. Projekti për Fondin Sovran e ka vendosur në qendër të zhvillimit të ardhshëm ekonomik Trepçën”, ka thënë Kurti.
Ai gjithashtu shtoi se është marrë me incidentin e fundit në Trepçë ku kryeshefit i ndërmarrjes është sulmuar në vendin e tij të punës dhe që sipas tij të dyshuar për rastin janë punonjës të kësaj ndërmarrjeje.
“U njoftova hollësisht mbi gjendjen dhe zhvillimet e fundit në Trepçë. Na vjen keq se çfarë ka ndodhur. Sulm i organizuar i dhunshëm mbi udhëheqjen. E dënojmë ashpër këtë sulm të tillë që është i drejtuar kundër Trepçës dhe s’është në të mirë të Kosovës. Zotohem si kryeministër se s’do të ketë as individë e as grup më të fuqishëm se shteti. Ata që synojnë të jenë më të fuqishëm, bien ndesh me ligjin dhe kushtetutshmërinë. Jemi qeverisje e mirë, andaj ushtruesi i detyrës së kryeshefit është Enis Abdurrahmani dhe e ka mbështetjen time të plotë bashkë me Bahriun që është kryesues i Bordit këtu. Këshilli grevist ka bërë kërkesë që ata që e kanë pësuar dhunën e atij grupi prej dhjetëra njerëzve që s’dihet krejt kush janë, që këta që i kanë paraqitur deklaratat në polici të tërheqin ato. S’u ka mjaftuar që e kanë sulmuar, por kërkojnë që tash këta të tërheqin deklaratën që e kanë pësuar dhunën. Kjo është e pashembullt dhe s’do të ndodhë. Edhe bordi aktual edhe ushtruesi i detyrës së kryeshefit e kanë mbështetjen e plotë tonën. Edhe punëtorët e kanë mbështetjen e plotë, por ne i ftojmë të mos bien pre e një këshilli grevist që kërkon që të tërhiqen deklaratat në Polici”, tha ndër të tjera Kurti.
Sipas Kurtit Qeveria është e fokusuar në zhvillimin e Trepçës, dhe që synojnë në shtimin e punëtorëve si dhe freskimin e tyre, duke u nisur nga fakti se mosha e minatorëve konsiderohet e shtyrë./Buletini Ekonomik/
