Vitin e kaluar, të ardhurat nga taksat dhe kontributet e sigurimeve shoqërore ranë në vendet e Bashkimit Evropian për herë të parë që nga viti 2009, për shkak të pandemisë së COVID-19.
Agjencia e statistikave e BE-së, Eurostat tha sot në një deklaratë se vendet e bllokut mblodhën rreth 5,5 trilionë euro (6,4 trilionë dollarë) në taksa dhe kontribute të sigurimeve shoqërore në 2020, 215 miliardë më pak se në 2019.
Vetëm në eurozonë të ardhurat ranë me 206 miliardë euro.
“Kjo ishte hera e parë, në më shumë se një dekadë, që të ardhurat nga taksat ranë”, shkruan statisticienët.
Sipas Eurostat, arsyet e rënies ishin rënia e përgjithshme ekonomike gjatë pandemisë dhe masat e ndihmës, si ulja e taksave, që u zbatuan për të zbutur efektet e krizës.
Megjithatë, në lidhje me produktin ekonomik, të ardhurat nga taksat si përqindje u rritën lehtas, pas tkurrjes së ekonomive të BE-së gjatë pandemisë.
Vitin e kaluar, taksat dhe kontributet e sigurimeve shoqërore arritën në 41,3 për qind të PBB-së së vendeve të BE-së, në krahasim me 41,1 për qind një vit më parë./atsh
