Ndërmarrja Hidroekonomike “Ibër-Lepenci”, përmes një komunikate për media, ka njoftuar se si institucion ata kanë vendosur që kontrata e shitjes së energjisë elektrike që u publikua ditë më parë si një kontratë e dëmshme, të procedohet tutje tek organet e drejtësisë, konkretisht tek Njësia e Krimeve Ekonomike.
Nga kontrata e publikuar nga vetë drejtuesit e ri të Bordit të kësaj ndërmarrjeje, u konstatua se Ibër-Lepenci po e shiste rrymën shumë më lirë se sa çmimi me të cilin tash Kosova po importon energji për shkak të një kontrate të dëmshme, përcjell Buletini Ekonomik.
Sipas tyre, ky procedim deri të krimet ekonomike do të bëhet për shkak të dyshimit ekzistues se me lidhjen e asaj kontrate janë shkelur të gjitha procedurat për tregtimin e energjisë elektrike.
Pesë ditë më parë, kryetarja e re e Bordit të ndërmarrjes publike “Ibër-Lepenci”, Hyrmet Mydyti, deklaroi se se shkaku i kontratës së nënshkruar më herët, kjo ndërmarrje s’po mund ta ndihmojë vendin në krizën energjetike, sepse marrëveshja e gjetur në zyret e kësaj ndërmarrjeje, bën që “Ibër-Lepenci” të shesë rrymën me çmim prej 38.11 euro për megavat për orë, ndërsa Kosova tash po e blen atë me çmim prej 60 deri 300 euro për MWh.
Tutje edhe Zyra e Rregullatorit të Energjisë kishte gjobitur ndërmarrjen “Ibër-Lepencin” për këtë kontratë të shitjes së energjisë.
“Me anë të kësaj komunikate nga ana e NH “Iber-Lepenc” sh.a., ju njoftojmë se sot, konkretisht me 23.12.2021, është mbajtur Mbledhja e Jashtëzakonshme e Bordit të Drejtorëve të ndërmarrjes hidroekonomike “Iber-Lepenc” sh. a, në të cilën Bordi i Drejtorëve, bazuar në raportin e ZAP dhe Vendimit të shqyrtimit të gjobës nga ana e ZRRE-së, mori vendim që kontrata e shitjes së energjisë të procedohet në Njësinë e krimeve ekonomike, për shkak të dyshimit të bazuar për shkeljen e procedurave për tregtimin e energjisë gjatë lidhjes së kësaj kontrate”, sqarohet tutje në njoftimin e ndërmarrjes. /Buletini Ekonomik/
