Kryeministri i Kosovës, Albin Kurti, në mbledhjen e sotme të Qeverisë, ka deklaruar se Qeveria do të dalë me një propozim për nivelin e pagës minimale së shpejti.
Sipas Kurtit, rritja e pagës minimale po bëhet me qëllim që njerëzve t’iu mundësohet një jetë më e dinjitetshme, si dhe me këtë projektligj të përgatitur, ai theksoi se do të evitohen pasiguritë ligjore ekzistuese.
Gjithashtu, ai njoftoi se sot është marrë vendimi që obligon administratën shtetërore që sivjet të plotësojë kuotën për punësimin e personave me aftësi të kufizuara.
Ndryshe, paga minimale në Kosovë ka vite të tëra që s’ka lëvizur, kurse aktualisht paga minimale është 130-170 euro, që njëherit është paga më e ulët minimale në rajon.
Para dy ditëve, Ministria e Financave njoftoi se është në prag të finalizimit të projektligjit për rritjen e pagës minimale, mirëpo nuk është përcaktuar ende saktë niveli i saj. E sindikatat e punëtorëve të sektorit privat në Kosovë po kërkojnë që ky nivel të mos jetë nën shumën e 350 eurove, pasi si vendim të tillë, ata nuk do ta pranojnë. /Buletini Ekonomik/
