Si pasojë e konfliktit të Rusisë me Ukrainën, çmimet e derivative të naftës kanë pësuar rritje në tërë globin, përfshirë këtu edhe Kosovën.
“Çmimet e derivative janë të larta në krahasim të gjendjes ekonomike në Kosovë. Çmimin e përcakton BERZA dhe organizata prodhuese OPEC. Këto rritje e kanë kapluar tërë globin. Situata e tensionuar Rusi-Ukrainë, është shkaktar i ngritjes së çmimeve të derivative në tërë botën”, ka thënë Fadil Bernjani, kryetar i shoqatës së naftëtarëve.
Ekspertët e ekonomisë, vlerësojnë se përveç naftës, ngritje të çmimeve do të ketë edhe në produkte të tjera.
“Do të jetë një kosto që do ta godas ekonominë, por ky është realiteti dhe ajo që është më e mirë për qytetarët që është krizë kalimtare dhe dua të besoj që në fund të vitit dhe në fillim të vitit tjetër të pritet një normalizim”, ka thënë për RTK-në, Safet Gërxhaliu, ekspert i ekonomisë.
“Vetëvetiu, ngritja e çmimit të naftës, do të sjellë si pasojë zingjirore edhe ngritjen e çmimeve tjera, të cilat janë produkte dhe marra elementare në Kosovë”, deklaroi, Nagip Skënderi, profesor universitar.
Për qytetarët, ngritja e çmimit të naftës, është e papërballueshme.
“Me krahasu këtu po marrim shembull me jashtë, është e papërballueshme, me të ardhurat që i kemi ne“.
“Po pati më shumë do të lirohet, po s’ka naftë, do të shtrenjtohet”
“Në gjithë botën po shtrenjtohet. Ky është problem botëror ndërkombëtar. Njerëzit këtu e vuajnë më shumë, se normal është jetesa shumë më e ulët se andej, por shpresojmë të bëhet mirë”, deklarohen disa qytetarë.
Sipas çmimeve globale, të martën një fuqi naftë, ka kushtuar 100 dollarë, ndërkaq në Shqipëri, 1 litër naftë ishte 1 euro e 64 centë, në Serbi 1 euro e 50 centë dhe në Maqedoninë e Veriut 1 euro e 21 centë. /RTK/
