Qeveria e Kosovës në mbledhjen e sotme ka miratuar Projektligjin për Pagën Minimale.
Pas këtij votimi në kabinetin qeveritar dhe më pas në Kuvend, i hapet rruga edhe rritjes së pagës minimale në Kosovë, e cila deri më tani ka qenë vetëm 130 deri në 170 euro për disa kategori. Paga minimale në Kosovë nuk ka ndryshuar që nga viti 2011.
Sipas këtij Projektligji, tani e tutje paga minimale në Kosovë do të jetë 264 euro bruto, kurse neto do të jetë fiks 250.
Kryeministri Albin Kurti, bëri gjithashtu me dije se me këtë ligj, pagat deri në shumën e 250 eurove do të lirohen nga pagesa e tatimit në pagë, përcjell Buletini Ekonomik.
Ai pati thënë më herët se nga rritja e pagës minimale pritet të përfitojnë mbi 100 mijë punëtorë në vend.
Hekuran Murati, Ministër i Financave, Punës dhe Transfereve në këtë mbledhje tha se miratimi i projektligjit për pagën minimale kontribuon edhe në rritjen ekonomike të vendit dhe produktivitetin e punëtorëve në vendet e punës.
Ndërkohë, me miratimin e këtij projektligji pritet të ndryshojnë edhe normat tatimore për pagat më të larta sesa 250 euro.
Pas miratimit të këtij projektligji në Qeveri, i njëjti duhet të miratohet edhe në Kuvendin e Kosovës.
Sipas rregullores së Kuvendit, shqyrtimi i parë i një projektligji nuk mund të bëhet pa kaluar dy javë pune por as më vonë se katër javë pune, nga dita e shpërndarjes së tij.
Pas kësaj, ligji u kthehet në shqyrtim komisioneve parlamentare, kurse më pastaj i dërgohen Kuvendit raportet me rekomandime për projektligjin në fjalë brenda dy muajve nga shqyrtimi i parë, ose pesë ditë pune para shqyrtimit të dytë në mbledhje plenare.
Ndryshe edhe Agjencia Evropiane e Statistikave më herët, pagën minimale në Kosovë e kishte cilësuar si pagën më të ulët në Evropë. /Buletini Ekonomik/
