Avni Sahiti dhe Fidane Spahija-Gjikolli janë emëruar anëtarë të Komisionit Rregullativ të Prokurimit Publik (KRPP).
Këtë kërkesë të Qeverisë e kanë miratuar deputetët e shumicës të cilët gjithashtu kanë votuar edhe ndryshimin dhe plotësimin e Ligjit për themelimin e Fondit Kosovar për Garanci Kreditore.
Me këtë ka përfunduar seanca e Kuvendit në të cilën ka dështuar miratimi i disa marrëveshjeve ndërkombëtare, mocioni i Partisë Demokratike të Kosovës për formimin e komisionit hetimor dhe debati për sigurinë në vend, i kërkuar nga Aleanca për Ardhmërinë e Kosovës.
“65 deputetë kanë votuar dhe të gjithë kanë votuar për, asnjë kundër dhe asnjë abstenim kështu që konstatoj që Kuvendi e mori këtë vendim, emërohen dy anëtarë të komisionit Rregullativ të Prokurimit Publik të cilët janë Avni Sahiti dhe Fidane Spahija-Gjikolli. Mandati i anëtarëve të Komisionit Rregullativ të Prokurimit Publik është pesëvjeçar pa të drejtën e riemërimit. Sa i përket vazhdimit të seancës, sepse na mbetën tri çështje mos harroni, marrëveshjet ndërkombëtare, mocioni procedural i PDK-së dhe debati për çështjen e sigurisë, shihemi kurdo që ta vendosim për vazhdimin e kësaj seance”, ka thënë Konjufca.
Seanca plenare ka vijuar pa deputetët e opozitës meqë të njëjtit kanë deklaruar se nuk do të marrin pjesë në votime deri në formimin e komisionit hetimor për krizën energjetike në vend.
Kështu në mungesë të kuorumit ka dështuar miratimi i disa marrëveshjeve ndërkombëtare.
Marrëveshjet ndërkombëtare që ishin në rend dite:
3. Shqyrtimi i Projektligjit nr.08/L-130 për ratifikimin e Marrëveshjes ndërmjet Qeverisë së Republikës së Kosovës dhe Këshillit të Ministrave të Republikës së Shqipërisë për ndihmë të ndërsjellë juridike në çështjet civile dhe tregtare,
4. Shqyrtimi i Projektligjit nr.08/L-139 për ratifikimin e Marrëveshjes së kredisë ndërmjet Republikës së Kosovës dhe Bankës Evropiane për Investime për projektin e zhvillimit të impiantit të ujërave të zeza në Mitrovicë,
5. Shqyrtimi i Projektligjit nr.08/L-140 për ratifikimin e Marrëveshjes së kredisë në mes të Republikës së Kosovës dhe Bankës Evropiane për Rindërtim dhe Zhvillim për projektin e trajtimit të ujërave të zeza në Mitrovicë,
6. Shqyrtimi i Projektligjit nr.08/L-141 për ratifikimin e Marrëveshjes së financimit në mes të Republikës së Kosovës përfaqësuar nga Ministria e Financave, Punës dhe Transfereve, dhe Asociacionit Ndërkombëtar për Zhvillim për “Projektin e reformës së sistemit të ndihmës sociale në Kosovë”.
