Ministrja e Ekonomisë, Artane Rizvanolli, ka diskutuar dje në seancën e Kuvendit të Kosovës, për zhvillimet e vendosjes së projekteve të reja të burimeve të riëprtëritshme në Kosovë.
Ajo dje u pyet edhe për një projekt të mëparshëm, projektin Solar4Kosovo, i cili parasheh vendosjen e rreth 70 MW në kapacitetet e instaluara të kolektorëve diellorë, raporton Kosovo.Energy.
Sipas deklaratave të mëparshme për këtë çështje, përfaqësuesit e Qeverisë theksuan se kapacitetet do t’i shtohen ngrohjes qendrore të Prishtinës.
Ndërkaq, ministrja Rizvanolli në seancën e djeshme të Kuvendit të Kosovës ka diskutuar për detajet e projektit, financimin, dhe se kur do të hyjnë në funksion projektet e tjera të mundshme të BRE.
“Projekti Solar for Kosovo për ngrohjen qendrore në Prishtinë, me energji solare, sipas vlerësimit fillestar të studimit parafizibilitetit të vitit 2019, ka qenë i vlerësuar se do të kushtojë rreth 64 milion euro”, theksoi ajo.
“Kosto finale e projektit pritet të përditësohet gjatë këtij muaji në kuadër të finalizimit të studimit të fizibilitetit, i cili është duke u realizuar me grant nga qeveria Gjermane”, vazhdoi ajo.
“Sipas shifrave të studimit të parë, është bërë një plan i financimit si në vijim: Grant nga Qeveria Gjermane, përkatësisht nga KfW – do të jepen 36 milionë euro. 5 milionë euro pritet të jetë kontributi nga Termokos, kemi aplikuar gjithashtu për një grant investim nga Western Balkans Investment Framework -WBIF, për 15 milionë euro, dhe pjesa tjetër është kredi nga BERZH. Me këto shifrat që i kemi aktualisht, sipas studimit të parafizibilitetit, 12 milionë euro është kredia nga BERZH”, bëri të ditur Rizvanolli.
Për më tepër, ajo vuri në dukje se kapaciteti aktual i instaluar i projektit të kogjenerimit, që shfrytëzon prodhimin e avullit të KEK-ut për të ngrohur një pjesë të konsiderueshme të zonës qendrore të kryeqytetit të vendit, Prishtinës, është 140 MW.
Duke marrë parasysh këtë, shtimi i 70 MW përkthehet në një 50% shtesë nëpërmjet vetëm një projekti, raporton Kosovo.Energy.
Ndërsa ajo ndau se funksionimi i projektit parashikohet të fillojë tek në vitin 2025.
“Sa i përket operimit dhe zbatimit të projektit, Termokos do të jetë njësia ekzekutive e projektit, që ka për përgjegjësi koordinimin e përgjithshëm të projektit, kontrollimin dhe administrimin e tij”, tha ajo.
“Ndërsa, Ministria e Financave do të jetë përgjegjëse për nënshkrimin e marrëveshjeve ndërkombëtare dhe kanalizimin e tyre tek Termokosi. Sa i përket vitit të finalizimit, planifikohet që projekti të përfundojë në vitin 2025”, theksoi Rizvanolli.
“Sa i përket energjisë termike, për ngrohje, kapaciteti i kogjenerimit është 140MW, ndërsa po i shtohen me këtë projekt edhe 70MW, që do të thotë se për 50% po rritet kapaciteti i ngrohjes qendore në Prishtinë vetëm me këtë projekt”, tha tutje ajo.
Deri më 2025, Kosova do të ketë të paktën 200MW kapacitete të reja të BRE-ve
Në anën tjetër, Rizvanolli ka diskutuar edhe për fazat aktuale apo zhvillimin e projekteve të tjera të energjisë së rinovueshme në Kosovë.
Një që ishte raportuar më parë nga Kosova.Energy, është termocentrali diellor 100 MW në tokën e KEK-ut.
E dyta, megjithatë, sipas Rizvanollit, do të zhvillohet nga sektori privat, pasi deri në fund të vitit, pritet të hapet një ankand – sërish deri në 100 MW për kapacitet diellor.
Në total, sipas ministres Rizvanolli, brenda tre viteve Kosova do të ketë së paku 200 MW energji nga kapacitetet e reja të instaluara nga BRE-të.
“Sa i përket projekteve të tjera të BRE, janë disa duke u planifikuar dhe ndodhur paralelisht”, nënvizoi Rizvanolli.
“I pari është projekti për një park solar, të parin në Kosovë, në tokën e KEK, kapacitet prej 100MW”, ndau ajo.
“I dyti, parashihet të jetë një investim nga sektori privat, në bazë të pilot ankandit që do të lansohet deri në fund të vitit me kapacitet 50 deri në 100MW”, theksoi ajo.
“Ndërsa, vitin tjetër pritet që të lansohen edhe ankande të tjera për energji me erë dhe ose solare”, tha Rizvanolli.
“Kjo i bie që brenda 3 viteve të ardhshme deri në vitin 2025, ne të kemi së paku 200MW, të reja për prodhimin e energjisë së ripërtëritshme, që i bie së paku dyfishim i kapaciteteve aktuale për burime të ripërtëritshme të energjisë, deri në fund të mandatit”, përfundoi ajo.
