Bordi i Drejtorëve në Agjencinë Kosovare të Privatizimit (AKP) ka përzgjedhur dje drejtorin menaxhues të këtij institucioni.
Tashmë drejtori i ri menaxhues në këtë Agjenci, është Arben Limani, i cili me profesion është jurist, përcjell Buletini Ekonomik.
Sipas njoftimit zyrtar nga AKP, Limani ka një përvojë pune 20 vjeçare profesionale në sektorin privat dhe publik, me specializim në zhvillimin dhe zbatimin e politikave publike, të mbështetur me edukim të lartë në shkencat juridike brenda dhe jashtë vendit.
Në Agjencinë Kosovare të Privatizimit (AKP), Limani kishte qenë i angazhuar që nga viti 2009 deri më tani, ku kishte mbajtur pozitën e Drejtorit të Sekretarisë Ekzekutive të Bordit të Drejtorëve nga viti 2011 e tutje.
“Studimet themelore i ka kryer në Fakultetin Juridik të Universitetit të Prishtinës. Studimet Master i ka te kryera në Chicago-Kent College Of Law, Illinois Institute of Technology, në Chicago të Illinois (SHBA), në lëmin e Drejta e Shërbimeve Financiare si bursist i Fondacionit Kosovaro Amerikan për Edukim të Lartë (KAEF). Flet rrjedhshëm gjuhën angleze dhe gjuhën serbe”, thuhet në njoftimin e AKP-së.
Përveç kësaj, në mbledhjen e djeshme të Bordit të AKP-s, është shqyrtuar dhe miratuar edhe buxheti vjetor i Agjencisë për vitin fiskal 2023.
Bordi gjithashtu shqyrtoi edhe raportin e Zyrës Kombëtare te Auditimit për pasqyrat financiare vjetore të Agjencisë për vitin 2021 ku Zyra Kombëtare e Auditimit (ZKA) ka dhënë opinion të pamodifikuar për pasqyrat financiare vjetore të AKP-së për vitin fiskal 2021.
Në bazë të komunikatës për media, Bordi i AKP-së me këtë rast, ka kërkuar plan konkret për adresimin e rekomandimeve të ZKA-së. /Buletini Ekonomik/
