Administrata Tatimore e Kosovës, ua ka rikujtuar edhe njëherë të gjithë tatimpaguesve në vend, se janë të detyruar të deklarojnë dhe të paguajnë tatimet dhe Kontributet Pensionale në mënyrë reale dhe në kohë, ashtu siç është përcaktuar me legjislacionin tatimor.
Ata thonë se aktivitetet e ATK-së, vazhdimisht përqendrohen pikërisht te personat, të cilët nuk i deklarojnë të ardhurat e krijuara dhe nuk paguajnë Tatimin dhe Kontributet Pensionale.
Për personat fizikë jo afarist, personat fizikë afarist dhe personat juridikë, të cilët nuk deklarojnë të ardhurat e krijuara dhe nuk paguajnë Tatimet dhe Kontributet Pensionale, ATK paralajmëron se do të ndërmarrë masa ndëshkuese sipas legjislacionit tatimor.
ATK-ja përmes një komunikate për media sot, iu ka bërë thirrje të gjithë personave që të deklarojnë të ardhurat e krijuara apo të korrigjojnë sa më parë deklaratat e tyre dhe të përmbushin të gjitha detyrimet tatimore të parapara me legjislacionin tatimor.
Kjo pasi, sipas tyre, me kryerjen e detyrimeve tatimore, qytetarët kontribuojnë direkt në financimin e programeve qeveritare siç janë: ofrimi i shërbimeve publike, arsimim me standarde të larta, mirëqenie shëndetësore dhe sociale, mbrojtje ligjore dhe siguri, si dhe infrastrukturë të përgjithshme për një mirëqenie më të mirë ekonomike dhe shoqërore.
“Pagesa e tatimit, siguron qëndrueshmëri të ekonomisë në vend”, përfundon njoftimi i ATK-së. /Buletini Ekonomik/
