Kryeministrja e re e Britanisë së Madhe, Liz Truss, ka thënë se qeveria e saj do të kufizojë çmimet e brendshme të energjisë për të lehtësuar krizën e madhe të kostos së jetesës.
Truss ka shtuar se ajo, gjithashtu, do të miratojë më shumë shpime të naftës në Detin e Veriut dhe do të heqë ndalimin e frakingut në një përpjekje për të rritur furnizimin e brendshëm me energji të Britanisë së Madhe.
Ajo u ka thënë deputetëve se “garancia e çmimit të energjisë” dyvjeçare do të thotë se faturat mesatare të familjes nuk do të jenë më shumë se 2 mijë e 500 funta në vit për ngrohje dhe energji elektrike.
Faturat do të rriteshin në 3 mijë e 500 paund në vit nga tetori i këtij viti, trefishi i kostos së një viti më parë.
Çmimet po rriten në qiell për shkak të luftës së Rusisë në Ukrainë dhe pas goditjeve ekonomike të COVID-19 dhe Brexit, raporton euronews.
“Ne po e mbështesim këtë vend gjatë këtij dimri dhe të ardhshëm dhe po trajtojmë shkaqet rrënjësore të çmimeve të larta, kështu që nuk jemi më kurrë në të njëjtin pozicion,” ka thënë Truss.
Biznesi dhe institucionet publike si spitalet dhe shkollat do të marrin gjithashtu mbështetje, por për gjashtë muaj dhe jo për dy vjet.
Qeveria ka thënë se kufiri do të ulë normën në rritje të inflacionit në Britaninë e Madhe me 4 deri në 5 pikë përqindjeje. Teksa inflacioni ka arritur në 10.1% në korrik dhe parashikohet të rritet në 13% përpara fundit të vitit.
Njoftimi, në ditën e dytë të plotë të Truss në detyrë, ka ardhur pas një vere në të cilën qeveria ka refuzuar të thoshte se si do t’i përgjigjej.
Ish-kryeministri Boris Johnson nuk ishte në gjendje të merrte vendime të rëndësishme pasi kishte njoftuar në korrik se do të jepte dorëheqjen.
Ndërkaq Truss, e cila ka fituar garën e Partisë Konservatore për të zëvendësuar Johnson si udhëheqëse, nuk kishte pranuar të shpallte planet e saj përpara se të ishte në detyrë.
