Kosova në muajin gusht të këtij viti ka shënuar një vlerë rekorde sa i përket importit të mallrave nga vendet e huaja.
Saktësisht 526.8 milionë euro është vlera e mallrave të importuara në vend vetëm gjatë gushtit, që është një rritje prej 26 për qind krahasuar me periudhën e njëjtë të vitit 2021, përcjell Buletini Ekonomik.
Në bazë të të dhënave më të fundit nga Agjencia e Statistikave të Kosovës (ASK), deficiti tregtar i Kosovës mes importit dhe eksportit gjatë këtij muaji ka qenë 441.9 milionë euro, ku eksporti i mallrave në muajin gusht 2022 kishte vlerën e vetëm 84.8 milionë eurove, ndërsa importi siç e cekëm më lartë, shënoi një vlerë rekorde prej 526.8 milionë eurove.
Por, çka importoi më së shumti Kosova gjatë muajit gusht të këtij viti?
Sipas të dhënave të grupeve kryesore për import, sipas ASK-së, 22.9 për qind të totalit të mallrave të importuara e përbëjnë produktet minerale, 12.2% ushqimet e përgatitura,pijet dhe duhani, 10.5% makineritë, pajisjet mekanike dhe elektrike, 9.3% metalet bazë dhe artikujt prej tyre, 6.4% plastika,goma dhe artikujt prej tyre, 6.3% produkte të industrisë kimike, si dhe 6.0% mjetet e transportit, etj.
Importet e Kosovës nga vendet e BE-së gjatë gushtit u vlerësuan rreth 213,2 milion euro, ose 40.5% e importeve të përgjithshme, me një rritje prej 20.2%, nga viti i kaluar. Importet me pjesmarrje me të lartë ishin nga: Gjermania me 9.5%, Greqia me 8.7%, Italia me 3.8%, Sllovenia me 3.4%, etj.
Ndërsa, importet nga vendet e CEFTA-së në muajin gusht 2022, arritën në 100,0 milion euro, ose 19.0% të importeve të përgjithshme, me një rritje prej 26.9%. Vendet me pjesëmarrjen më të lartë për import ishin: Serbia me 7.4%, Maqedonia me 5.5%, Shqipëria me 4.1%.
Kurse, importet e Kosovës me vendet tjera të botës, arritën në 213,5 milionë euro, ose 40.5%. Vendet me pjesëmarrjen më të lartë për import në këtë grup ishin: Turqia me 13.6% dhe Kina me 10.1%. /Buletini Ekonomik/
