Kryeministri i Shqipërisë, Edi Rama, ka prezantuar paketën e re të rezistencës sociale, e cila riindekson pensionet brenda të njëjtit vit me normën e re të inflacionit, duke e çuar në 9.5% indeksimin vjetor
Kryeministri i Shqipërisë, Edi Rama, të enjten e tetë shtatorit ka prezantuar paketën e re të rezistencës sociale.
Rama ka thënë se për herë të parë paketa e rezistencës sociale riindekson pensionet brenda të njëjtit vit me normën e re të inflacionit, duke e çuar në 9.5% indeksimin vjetor.
“ Rrit me 10% mbështetjen mujore për ndihmën ekonomike dhe e dyfishon atë për gratë kryefamiljare me 2 fëmijë. Indekson me 7.5% pagesat për Aftësinë e Kufizuar dhe rrit mbështetjen financiare për energjinë elektrike për të verbërit, paraplegjikët e tetraplegjikët”, njofton kryeministri i Shqipërisë.
Tutje, në postimin e Edi Ramës shkruhet se kjo paketë rrit përsëri pagën minimale në 34 mijë lekë dhe sjell rritje pagash për administratën, Policinë e Shtetit dhe Policinë e Burgjeve.
Po ashtu, shton mbështetjen financiare për naftën pa taksa për fermerët, vijon mbështetjen e peshkatarëve për TVSH-në e naftës, konfirmon mbështetjen e mëtejshme për transportin publik.
Kryeministri i Shqipërisë, Edi Rama, ka përfunduar duke njoftuar se paketa e re e rezistencës sociale garanton mbrojtjen e çmimit të energjisë të paprekur për familjarët dhe bizneset e vogla.
