Prodhimi i energjisë nga burimet e rinovueshme mbuloi plotësisht kërkesën për energji elektrike të Greqisë për disa orë gjatë javës së kaluar, për herë të parë në historinë e sistemit të energjisë elektrike të vendit, tha operatori i pavarur i transmetimit të energjisë, IPTO.
Burimet e rinovueshme përbënin 100% të prodhimit të energjisë për të paktën pesë orë të premten e kaluar, duke arritur një rekord prej 3,106 megavat orë në 10 AM, sipas operatorit.
Ashtu si vendet e tjera europiane, Greqia e ka shkurtuar varësinë e saj nga gazi rus pas luftës në Ukrainë duke rritur importet e gazit natyror të lëngshëm (LNG). Ajo ka nxitur gjithashtu minierat e qymyrit, duke shtyrë planin e saj të dekarbonizimit.
Pjesa e burimeve të rinovueshme greke nga dielli, era dhe hidrocentralet qëndroi në 46% të energjisë mikse të vendit në tetë muajt e parë të vitit (deri në gusht), nga 42% në të njëjtën periudhë të një viti më parë, sipas institutit mjedisor “The Green Tank”.
Greqia synon të tërheqë rreth 30 miliardë euro në fondet evropiane dhe investimet private për të përmirësuar rrjetin e saj të energjisë elektrike dhe për të arritur më shumë se dyfishin e kapacitet të energjisë së rinovueshme.
Ajo planifikon të ketë 25 gigavat kapacitet të instaluar të energjisë së rinovueshme nga rreth 10 gigavat që ka aktualisht, por analistët thonë se Athina mund ta arrijë këtë objektiv më shpejt.
IPTO ka investuar në zgjerimin e rrjetit energjetik të vendit për të rritur kapacitetin e energjisë dhe për të lehtësuar depërtimin e energjisë diellore, të erës dhe atë hidroelektrike./ Reuters
