Sinjalet paralajmëruese po vënë në alarm të gjithë ekonominë globale, pasi inflacioni i lartë, rritja drastike e normave të interesit dhe lufta në Ukrainë po shkaktojnë shumë dëme.
Aktualisht ka 98.1% mundësi që të ndodhë një recesion global, sipas një modeli probabilitar të përgatitur nga Ned Davis Research.
Herët e vetme që ky model për vlerësimin e recesionit ka arritur vlera kaq të larta, kanë qenë rastet e rënieve të mëdha ekonomike. Rasti më i fundit ishte në vitin 2020, ndërsa tjetri gjatë krizës financiare globale të viteve 2008 dhe 2009.
“Kjo tregon se rreziku për një recesion të rëndë global po rritet për vitin 2023,” shkruajtën ekonomistët e Ned Davis Research në një raport të publikuar të premten e kaluar.
Në një kohë kur bankat qendrore po shtojnë përpjekjet e tyre për të vënë nën kontroll inflacionin, ekonomistët dhe investitorët po bëhen gjithnjë e më pesimistë për perspektivën ekonomike.
Shtatë nga 10 ekonomistë të anketuar nga Forumi Ekonomik Botëror e konsiderojnë një recesion global si “disi të mundshëm”, sipas një raporti të publikuar të mërkurën. Ekonomistët rivlerësuan parashikimet e tyre për rritjen ekonomike dhe tani presin që pagat reale të vazhdojnë të bien përgjatë pjesës tjetër të këtij viti dhe vitit të ardhshëm.
Duke marrë në konsideratë rritjen e çmimeve të ushqimeve dhe të energjisë, ka shqetësime se kostoja e lartë e jetesës mund të sjellë trazira. Shtatëdhjetë e nëntë përqind e ekonomistëve të anketuar nga Forumi Ekonomik Botëror presin që rritja e çmimeve të shkaktojë trazira sociale në vendet me të ardhura të ulëta, krahasuar me një pritshmëri prej 20% në ekonomitë me të ardhura të larta.
Investitorët gjithashtu po shqetësohen gjithnjë e më shumë, pasi Dow Jones Industrial Average po tregon shenjat e një tregu ku vlera e aksioneve është në rënie të vazhdueshme, për herë të parë që nga marsi i vitit 2020.
“Skenari ynë kryesor është për një situatë të vështirë deri në fund të vitit 2023,” tha të mërkurën investitori miliarder Stanley Druckenmiller në samitin e investitorëve të CNBC, Delivering Alpha. “Do të habitesha nëse nuk do të kishim një recesion në vitin 2023.”
Edhe zyrtarët e Rezervës Federale kanë pranuar se ekziston një rrezik i madh për të pasur rënie ekonomike.
Megjithatë, vazhdon të ketë disa drita shprese, veçanërisht për Shtetet e Bashkuara, të cilat përbëjnë ekonominë më të madhe në botë.
Tregu i punës në SHBA mbetet në një ndër situatat më të mira historike, pasi shkalla e papunësisë është në nivelet më të ulëta që nga viti 1969. Konsumatorët vazhdojnë të shpenzojnë para dhe fitimet e korporatave mbeten në nivele të qëndrueshme.
Ka gjithashtu shpresë se inflacioni më i rëndë i 40 viteve të fundit në SHBA do të reduktohet në muajt e ardhshëm, pasi oferta do të barazohet me kërkesën.
Studiuesit e Ned Davis thanë se, megjithëse rreziqet e recesionit janë duke u rritur, modeli i probabilitetit për vlerësimin e një recesioni në SHBA është “ende në nivele të ulëta”.
“Ne nuk kemi prova bindëse se SHBA-ja është aktualisht në recesion”, shkruajtën studiuesit në raport. /CNN/
