Dhoma e Tregtisë dhe Industrisë së Kosovës (DHTIK) e ka përshëndetur pjesërisht vendimin e marrë nga Qeveria gjatë muajit shtator për përkrahje të punëtorëve të sektorit publik dhe privat, teksa ka kundërshtuar edhe një herë vendimin për kushtëzimin e përkrahjes së punëtorëve të sektorit privat me ngritje të pagave nga ana e bizneseve, kushtëzim ky që nuk i është vendosur punëtorëve të sektorit publik.
“Dhoma e Tregtisë dhe Industrisë së Kosovës duke vlerësuar situatën e rënduar të bizneseve dhe punëtorëve të sektorit privat si pasojë e goditjes nga pandemia Covid-19, luftës në Ukrainë, rritjes enorme të çmimeve të produkteve të shportës familjare, naftës, gazit dhe shumë produkteve të tjera kërkon nga kryeministri dhe Qeveria, përkrahje direkte dhe pakushtëzime për punëtorët e sektorit privat”, ka theksuar Skënder Krasniqi, kryetar i DHTIK-së në konferencë media.
Ai ka kërkuar nga kryeministri Albin Kurti dhe ministria e Financave që të bëhet ekzekutimi i menjëhershëm apo në dy pjesë për punëtorët e sektorit privat në shumën prej 200 eurove, ashtu siç është duke ju dhënë punëtorëve të sektorit publik.
Teksa po kërkojnë dialog të drejtpërdrejt me qeverinë për problemet me të cilat po ballafaqohen bizneset, në anën tjetër DHTIK vazhdon të këmbëngulin në kërkesën për heqjen e TVSH-së.
Hamdi Malushaj tha se shteti duhet ta ndryshojë mendësinë e zhvillimit përmes sektorit privat.
“Sektori publik i nevojshëm por shpenzues. Ndër vite është e njëjta politik, ku në Kosovë shihet vetëm sektori publik si zhvillues i vendit. Sot jemi në hall, ku nuk kemi njerëz për punë, e ndërkohë kemi papunësi të madhe. Sektori privat është burim i mjeteve dhe i buxhetit. Kanë filluar edhe kompanitë të shpërngulen përpos individëve. Kanë hapur kompani me Gjermani e Zvicër”, ka theksuar Malushaj.
Sipas tij Kosova ka qenë i vetmi vend që në pandemi sektori publik i kanë marr pagat e plota, ndërsa sektori privat i ka bartur të gjitha pasojat.
“Politikat ndaj biznesit janë të paqarta në zhvillimin e vendit”, ka shtuar ai.
Drejtuesit e DHTIK-së kanë bërë të ditur se në sektorin privat janë 250 mijë punëtorë, të cilët me punën e tyre mbushin buxhetin e shtetit, nga i cili marrin paga edhe punëtorët e sektorit publik.
