Deputeti nga radhët e Partisë Demokratike të Kosovës, Ferat Shala, ka akuzuar partinë në pushtet për ndërhyrje politike në punën e bordit të Komisionit të Pavarur për Miniera e Minerale.
Ai, në një postim në Facebook, ka akuzuar se po bëhen gjashtë muaj, që bordi i KPMM-së ka dalë jashtë funksionit në kuptimin praktik, edhe pse juridikisht ka kuorum dhe ka mandat.
“E tërë kjo ka ndodhur si rezultat i ndërhyrjes politike, jo vetëm në fazën e përzgjedhjes së këtij bordi (që ishte selektuar nga Kryeministri Kurti), por edhe në fazën e fillimit të punës dhe procesit gjatë të ushtrimit të detyrës së tyre.
Tanimë për shkak të ndërhyrjeve politike, ky bord ka bërë shkelje të natyrave menaxheriale dhe profesionale, duke humbur kontrollin dhe arsyen për çka është i thirrur. Tërë kjo situatë rezulton të jetë e varur nga institucionet më të larta të shtetit siq është Kryeministri dhe Kryetari i Kuvendit”, ka shkruar Shala në Facebook.
Sipas tij, Kuvendi i Kosovës, përkatësisht kryetari i tij, e ka për obligim ta caktojë ushtruesin e detyrës apo kryesuesin e bordit të KPMM-së, i cili do të merrte përsipër thirrjen e mbledhjeve të bordit të KPMM-së.
“Nuk ka logjikë as sens juridik, që të bllokohet puna e një rregullatori të tërë, për shkak të pretendimeve çfarëdo qofshin ato, e të bllokohet tërë sektori i industrisë minerare”, shkruan pos tjerash Shala.