Një korridor hekurudhor dhe transportit detar miliarda dollarësh që lidh Indinë, Lindjen e Mesme dhe Europën u prezantua në samitin e G20, të mbajtur në Nju Delhi këtë fundjavë.
“Kjo është një punë e madhe”, tha presidenti amerikan Joe Biden.
Korridori Ekonomik Indi-Lindje e Mesme-Europë, i cili përfshin Emiratet e Bashkuara Arabe, Arabinë Saudite, Indinë, Jordaninë, Izraelin dhe Bashkimin Europian pritet të “rrisë ndjeshëm lidhjen dhe integrimin midis vendeve të përfshira në projekt”.
Këshilltari i Sigurisë Kombëtare i Shteteve të Bashkuara, Jake Sullivan tha se rrjeti pasqyronte vizionin e zotit Biden për “investime të gjera” që vijnë nga “udhëheqja efektive amerikane” dhe një gatishmëri për të përqafuar shtetet e tjera si partnerë.
Ai tha se infrastruktura e përmirësuar do të nxiste rritjen ekonomike, do të ndihmonte në bashkimin e vendeve në Lindjen e Mesme dhe do ta vendoste atë rajon si një qendër për aktivitetin ekonomik në vend që të jetë një “burim sfidash, konflikti apo krize” siç ka qenë në historinë e fundit.
“Korridoret transitore ndërkufitare nga anije në hekurudhë do të reduktojnë kostot e transportit në të gjithë rrjetin dhe do të lehtësojnë tregtinë e mallrave dhe shërbimeve për, nga dhe midis Emiratet e Bashkuara Arabe, Arabinë Saudite, Indinë dhe Europën,” raportoi Wam, agjencia e lajmeve arabe.
Emiratet e Bashkuara Arabe ishin pjesë e samitit G20 si të ftuar nderi.
Projekti do të ndihmojë gjithashtu në forcimin e eksporteve të pastra të hidrogjenit, si pjesë e përpjekjeve të përbashkëta për të ulur emetimet e gazrave serrë dhe për të integruar ruajtjen e mjedisit.
“Ne besojmë se ky projekt a është një mjet për të rritur jo vetëm tregtinë e ndërsjellë midis vendeve të ndryshme, por edhe për të rritur besimin e ndërsjellë”, tha kryeministri indian Narendra Modi.
Princi i kurorës i Arabisë Saudite, Mohammed bin Salman përmendi një shifër prej 20 miliardë dollarësh gjatë njoftimit. Ishte e paqartë nëse kjo vlerë do të zbatohej vetëm për angazhimin e Arabisë Saudite.
Amos Hochstein, koordinatori i zotit Biden për infrastrukturën globale dhe sigurinë e energjisë, përcaktoi një afat kohor të përafërt për projektin gjatë vitit të ardhshëm.
Në 60 ditët e ardhshme, grupet e punës do të hartojnë një plan më të plotë dhe do të përcaktojnë afatet kohore.
Faza e parë do të përfshijë identifikimin e zonave që kanë nevojë për investime dhe ku mund të lidhet infrastruktura fizike ndërmjet vendeve.
Hochstein tha se planet mund të vihen në zbatim gjatë vitit të ardhshëm në mënyrë që projekti të mund të kalojë në ngritjen e financave dhe ndërtimit.
Sullivan tha se projekti filloi të krijohej pasi Biden vizitoi Jeddah në korrik 2022, ku ai theksoi nevojën për një integrim më të madh ekonomik rajonal.
Ursula von der Leyen e përshkroi projektin si një “urë të gjelbër dhe dixhitale nëpër kontinente dhe qytetërime”. Ajo shtoi se projekti përfshin edhe kabllo për transmetimin e energjisë elektrike.
Ajo njoftoi gjithashtu një korridor trans-afrikan që lidh portin Angolan të Lobitos me zonat pa dalje në det të kontinentit: provincën Kananga në Republikën Demokratike të Kongos dhe rajonet e minierave të bakrit të Zambisë.
Duke folur për projektin afrikan, Biden e quajti atë një “investim rajonal që ndryshon lojën” dhe tha “të dyja këto projekte janë hapa të mëdhenj përpara”./ The National News
